Lıtvada qaıtadan karantın jarııalandy
Endigi shekteý buǵan deıin naýryz aıynyń ortasynan maýsymnyń ortasyna deıin engizilgen shekteýge qaraǵanda qatań bolmaıdy. Ol kezde eldegi tirshilik toqtap qalǵan bolǵan. Dárihanalar men saýda ortalyqtarynan basqa barlyq oryn jabylǵan.
Alaıda endi adamdar qoǵamdyq jerde únemi maska taǵyp júrýge mindetti bolady. Barlyq buqaralyq sharalar toqtatyldy. Murajaı, teatr, kınoteatr, ózge de mádenı mekemeler jabyldy. Dámhanalar men meıramhanalar endi tamaqty tek jetkizip berýmen shekteledi. Dúkender men qyzmet kórsetý kásiporyndary klıentterdi 10 sharshy metrge bir adamnan ǵana qabyldaıdy. Іs júzinde bul onda qyzmetkerlerden basqa tek bir klıent bola alatynyn bildiredi. Sondaı-aq, jınalatyn adamnyń sany besten aspaýy tıis.
Lıtva prezıdenti janyndaǵy koronavırýs boıynsha sarapshylar keńesiniń quramyna kiretin Lıtva eliniń densaýlyq saqtaý ǵylymdary ýnıversıtetiniń professory Mındaýgas Stankýnastyń juma kúni atap ótýinshe, karantınsiz elde aýrý juqtyrǵandar sany Rojdestvo merekesine qaraı shamamen 100 myń adamǵa deıin kóbeıip ketetin edi. Qazirgi kezde bul kórsetkish 20,7 adamǵa jetken. Sarapshynyń atap ótýinshe, karantın jaǵdaıy turaqtandyrýǵa kómektesýi tıis.
«Bizdiń baǵalaýymyz boıynsha, 20 qarashadan nemese oqıǵalardyń damýynyń basqa nusqasyna sáıkes, 27-nen bastap elde aýrý juqtyrý oqıǵalary azaıa túsedi», - dedi ol tilshilerge.
Qazan aıynyń basynda Lıtvada táýlik ishinde koronavırýs juqtyrǵan adamdyń sany 100-ge jetpeıtin, al 10 qazanda bul kórsetkish 200 adamnan asqan. 31 qazanda pandemııa bastalǵaly bir táýlik ishinde aýrý juqtyrǵan adamdardyń eń kóp sany – 1 001 oqıǵa tirkelgen. Juma kúni ol 1 656 oqıǵaǵa deıin kóbeıdi.
Lıtvada alǵashqy adam 28 aqpanda koronavırýs juqtyrǵan. Elde qaýipti vırýstan 192 adam qaıtys boldy, aýrý juqtyrǵan 5 454 adam jazylyp shyqqan. Respýblıkada osy ýaqytqa deıin 20 747 naýqas anyqtaldy. 38,2 myń adam ózin-ózi oqshaýlaý rejıminde.
