Lıtvada eń ádemi eshkini tańdaǵan baıqaý ótkizildi
ASTANA. QazAqparat - Lıtvanyń Panevejskıı ýezi Ramıgala qalasynda jyl saıyn ótetin eshkiler arasyndaǵy sulýlyq baıqaýy uıymdastyryldy. Nátıjesinde Demıt esimdi 16 aılyq eshki eń kórikti dep tanyldy, dep habarlady delfi.lt.
Qalanyń dástúrli sımvoly bolyp tabylatyn eń kórikti eshki baıqaýyna 500 adam jıyldy.
Mereke baǵdarlamasynda gúldermen jáne ózge de túrli áshekeımen bezendirilgen eshkilerdiń sherýi, orkestrdiń óner kórsetýi, bı nómirleri qarastyrylǵan.
Jyldyń eń kórikti eshkisi atanǵan janýardyń ıesi 74 jastaǵy zeınetker, mamandyǵy boıynsha veterınarlyq dáriger Ferdınandas Petkevıchıýs 6 ret baıqaýǵa qatysyp, birinshi márte jeńiske jetti.
Ramıgala qalasy úshin eshkiler úlken mańyzǵa ıe. Bul janýarlar XIII ǵasyrdaǵy qoljazbalarda jazylǵan eski qalashyqtyń sımvoly. 2010 jyly qala Lıtvanyń mádenı astanasy atanǵanda, onyń turǵyndary alǵash ret osy baıqaýdy uıymdastyrǵan.
Sol kezden bastap ol jyl saıyn ótkiziledi.
