Lıtvada «EKSPO-2017» kórmesiniń qorytyndysy shyǵaryldy

ASTANA. QazAqparat -Vılnıýs qalasyndaǵy Martınas Majvıdas atyndaǵy Lıtvanyń Ulttyq kitaphanasynda Astanada ótken «Energııa bolashaǵy» taqyrybynda «EKSPO-2017» Halyqaralyq mamandandyrylǵan kórmesine Lıtvanyń qatysýynyń qorytyndysyna arnalǵan is-shara uıymdastyryldy, dep habarlaıdy QR SІM baspasóz qyzmeti.

Іs-sharada Lıtvanyń qorshaǵan ortany qorǵaý mınıstri Kestýtıs Navıtskas, Lıtvanyń syrtqy ister vıtse-mınıstri Darıýs Skýsıavıchıýs, Lıtvanyń Qazaqstandaǵy Elshisi Vıtaýtas Naýdýjas, Lıtva pavılonynyń ulttyq komıssary Romas ıAnkaýskas sóz sóıledi.

Qazaqstannyń Elshisi Baýyrjan Muhametjanov lıtva tarapyna kórmege belsendi qatysqany jáne óziniń ekspozıtsııasyn maǵynaly, ári joǵary uıymdastyrý deńgeıi nátıjesinde kórme taqyrybyn ashqany úshin, sonymen qatar, tehnologııanyń sońǵy jetistikterin, úzdik ulttyq brendterdi, Lıtvanyń baı tarıhy men mádenıetin usynǵany úshin rızashylyǵyn bildirdi.

Sondaı-aq, Elshi «Nur Álem» qazaqstandyq pavılon jáne basqa da birqatar pavılondar «EKSPO murasy» retinde saqtalady dep atap ótti. Aýdıtorııaǵa kórme kesheninde birneshe jańa iri jobalardyń iske qosylýy, atap aıtqanda «Astana» Halyqaralyq qarjy ortalyǵy, «jasyl» tehnologııalar men ınvestıtsııalardy, IT jobalardyń halyqaralyq tehnoparkin damytý boıynsha halyqaralyq ortalyq týraly aqparat berdi.