Lıtvada Abaı men ál-Farabı týraly kitaptar tanystyryldy

NUR-SULTAN. QazAqparat - Ál-Farabı atyndaǵy Qazaq ulttyq ýnıversıtetiniń «Qazaq ýnıversıteti» baspa úıi Qazaqstan Respýblıkasynyń Lıtvadaǵy Elshiligimen jáne Lıtvanyń «Jara» baspa úıimen birlesip, ál-Farabıdiń 1150 jyldyǵy men Abaı Qunanbaıulynyń 175 jyldyǵyna oraı XXI Halyqaralyq Vılnıýs kitap kórmesine qatysýda, dep habarlaıdy QazAqparat tilshisi.

Bul týraly Qazaqstan Respýblıkasynyń Lıtvadaǵy Elshiligi málim etti.

«Lıtvalyq oqyrmandardyń nazaryna Shyǵystyń uly oıshyly Ábý Nasyr ál-Farabıdiń jáne qazaq aǵartýshysy Abaı Qunanbaıuly týraly jazylǵan elýden astam kitap usynyldy», delingen atalǵan habarlamada.

Kórme barysynda Qazaqstan jáne Lıtva arasynda seriktesterimen kelissózder júrgizilip, Elbasynyń «Rýhanı jańǵyrý» jáne «Uly Dalanyń 7 qyry» atty baǵdarlamalyq maqalalaryn iske asyrý aıasynda ǵylymı jáne kórkem ádebıet salasyndaǵy birlesken jobalar júrgizý týraly kelisimsharttarǵa qol qoıyldy.

Halyqaralyq Vılnıýs kitap kórmesi Baltyq elderinde eń iri jáne mańyzdy kitap kórmesi bolyp sanalady.

4 kúndik kórmede 500-den astam mádenı is-sharalar ótkiziledi dep josparlanyp, Lıtva jáne memleket aýmaǵynan 60 000-nan astam kórermen keledi dep kútilýde.