Lıtvada 25 áskerı qyzmetshi kýrstyq daıarlyqtan ótti - QR QM (FOTO)

ASTANA. QazAqparat - Búgin QR Qorǵanys mınıstrliginde Qazaqstan men Lıtva qorǵanys vedomstvolary ókilderiniń shtabtyq kelissózderi ótti. Eki eldiń áskerı qyzmetshileri áskerı yntymaqtastyqtyń jaı-kúıi men keleshegin, sondaı-aq óńirlik qaýipsizdiktiń aspektilerin talqylady.

Qazaqstandyq delegatsııanyń basshysy, QR QM Halyqaralyq yntymaqtastyq departamentiniń basshysy, polkovnık Ádil Bekov QR Qarýly Kúshteri Qorǵanys mınıstrliginiń basym mindetteriniń biri - áskerı qaýipsizdikti qamtamasyz etý aıasynda shetel memleketteriniń tájirıbesin zerdeleý arqyly áskerılerdi daıarlaý ekendigin atap ótti. 

Sondaı-aq halyqaralyq áskerı yntymaqtastyqtyń mańyzdy aıasynyń biri bilim men ǵylym ekenin atap ótip, kýrstyq daıarlyqqa qatysý úshin lıtvalyq taraptyń usynyp otyrǵan kvotasy úshin alǵys bildirdi.

2008 jyldan bastap Lıtvanyń joǵary oqý oryndarynda QR Qarýly Kúshteriniń 50-ge jýyq áskerı qyzmetshisi bilim alyp, onyń ishinde sońǵy 2012-2015 jyldary 23-ke tarta qazaqstandyq áskerı qyzmetshi sol jerde kýrstyq daıarlyqtan ótti.

Sonymen birge, Lıtva Respýblıkasy Qorǵanys mınıstrliginiń Halyqaralyq yntymaqtastyq jáne operatsııalar departamentiniń dırektory Robertas Shapronas basqaryp otyrǵan lıtvalyq delegatsııa tyńdaýshylarǵa dáris oqý, sondaı-aq Áskerı-strategııalyq zertteýler ortalyǵynda kezdesý úshin Elbasy - Tuńǵysh Prezıdent atyndaǵy Ulttyq qorǵanys ýnıversıtetine attandy. 

QR Qorǵanys mınıstrligi Ulttyq qorǵanys ýnıversıtetinde dáris oqýǵa elshiler, áskerı attasheler, sondaı-aq sheteldiń áskerı-ǵylymı ortasynyń ókilderi  udaıy shaqyrylyp turady.