Lıtvada 239 qazaqstandyq stýdent «Bolashaqpen» oqyp jatyr
Lıtva Syrtqy ister mınıstri Gabrıelıýs Landsbergıspen ótken kelissózdiń qorytyndysy týraly BAQ aldynda málimdeme jasaǵan QR Premer-Mınıstriniń orynbasary – Syrtqy ister mınıstri Muhtar Tileýberdi eki aradaǵy mádenı baılanystardyń mazmunyna toqtaldy
«Mádenı-gýmanıtarlyq yntymaqtastyq josparly túrde damýda. Qazir Lıtvada «Bolashaq» baǵdarlamasymen qosa 239 qazaqstandyq stýdent bilim alýda. Lıtva ýnıversıtetteri ozyq medıtsınalyq standarttardy qazaqstandyq bilim berý júıesine transfertteýge belsendi qatysady», - dedi vıtse-premer.
Onyń paıymynsha, eki eldiń jaqyndasýynda tarıhı jady mańyzdy faktor atqaryp otyr.
«Lıtvada qazaq halqynyń jappaı jer aýdarý jyldaryndaǵy kómegi jyly eske alynady jáne baǵalanady. Lıtvada qazaq halyq mýzykasynyń kontsertteri júıeli túrde ótkizilip turady, qazaq klassıkteriniń kitaptary lıtva tilinde jaryq kórdi. Ál-Farabı ortalyǵy, Vılnıýs aýdandyq kitaphanasynda Abaı atyndaǵy oqý zaly jumys isteýde, sonymen qatar «toǵyzqumalaq» oıynynyń federatsııasy da ashyldy. Gabrıelıýs Landsbergıs myrzanyń sapary Astana men Vılnıýs arasyndaǵy ekijaqty jáne kópjaqty formattaǵy dostyq pen seriktestik qatynastardy nyǵaıtýǵa qosymsha serpin beredi dep senemin», - dep túıindedi Muhtar Tileýberdi.
