Lıtvada 16 jasqa deıingi balalardyń áleýmettik jelilerge kirýin shekteý usynyldy

ASTANA. KAZINFORM — Lıtva parlamentiniń (Seım) depýtaty Daıva Ýlbınaıte juma kúni zańǵa túzetýler engizýdi usyndy. Oǵan sáıkes, 16 jasqa deıingi balalardyń áleýmettik jelilerge kirýine shekteý qoıylady, dep habarlaıdy Anadoly Delfi.lt basylymyna silteme jasap.

Sondaı-aq, platformalarǵa paıdalanýshylardyń jasyn tıimdi tekserý mindetteledi.

Depýtattyń aıtýynsha, bul ózgerister balalardyń áleýmettik jelilerge táýeldiliginiń artýy men olardyń densaýlyǵyna qaýip tóndiretin naqty qaterlerdi eskere otyryp jasalǵan.

— Temeki, alkogol nemese qumar oıyndar sııaqty qaýipti nárselerge jas shekteýi bar. Tsıfrlyq keńistikte de adamnyń tsıfrlyq jetilý jasyn belgileý qajet, sol arqyly ol óziniń áreketteri úshin jaýapkershilikti óz moınyna alady. Sondyqtan men áleýmettik jelilerdi 16 jastan bastap qoldanýǵa ruqsat etý jáne platformalarǵa jasyn naqty rastaýdy talap etetin tıimdi júıelerdi qoldanýdy usynamyn, — dedi Ýlbınaıte.

Zańǵa ózgerister engizilgen jaǵdaıda, áleýmettik jeli qyzmetin usynýshylar paıdalanýshynyń jasyn naqty rastaýǵa múmkindik beretin tehnologııalyq mehanızmderdi qoldanýǵa mindetti bolady.

16 jasqa deıingi balalar zańdy negizsiz tirkelý nemese qyzmetti paıdalaný múmkindiginen aıyrylatyn bolady.

Óz kezeginde platformalar jasyn tekserý mindetterin oryndamaǵan jaǵdaıda ákimshilik jaýapkershilikke tartylatyn bolady.

Aıta keteıik, osy bastamany qoldaǵan elderdiń qatary kóbeıip keledi. Máselen, Aýstralııa jasóspirimderdiń áleýmettik jelini qoldanýyna alǵashqy bolyp tyıym saldy.

Dál osyndaı tyıym Ulybrıtanııada salynatyny belgili boldy.