Lıtva ıadrolyq qarýdy ornalastyrýǵa tyıymdy alyp tastamaq
ASTANA. KAZINFORM — Lıtva parlamenti el aýmaǵynda ıadrolyq qarýdy ornalastyrýǵa qoıylǵan tyıymdy alyp tastaýǵa qatysty Konstıtýtsııaǵa túzetýler engizý týraly zań jobasyn qaraýǵa qoldaý bildirdi, dep habarlaıdy DW.
Túzetýdi qaraýǵa 89 depýtat qoldap daýys berse, 11-i qarsy, taǵy 6 depýtat qalys qaldy.
Lıtva Prezıdenti Gıtanas Naýseda bul bastamany ótken aptada Berlınge sapary kezinde jarııalap, eldiń NATO-nyń ıadrolyq tejeý júıesine qosylýǵa daıyn ekenin málimdegen bolatyn.
Sonymen birge Prezıdent qazirgi ýaqytta Lıtva aýmaǵynda beıbit kezeńde ıadrolyq qarýdy ornalastyrý jospary joq ekenin atap ótti.
Zań jobasyn usynǵan bılik koalıtsııasynyń ókilderi Konstıtýtsııadaǵy bul shekteýdi alyp tastaý Lıtvanyń ıAdrolyq qarýdy taratpaý týraly shart pen basqa da halyqaralyq kelisimder aıasyndaǵy mindettemelerine áser etpeıtinin aıtty.
Zań jobasyn parlamenttiń kúzgi sessııasynda qaraý josparlanyp otyr.
Qazirgi tańda Lıtva — NATO-ǵa múshe memleketterdiń ishinde óz aýmaǵynda ıadrolyq qarýdy ornalastyrýǵa osyndaı konstıtýtsııalyq shekteý engizgen sanaýly elderdiń biri.
Buǵan deıin Financial Times basylymy Vılnıýstiń Lıtva aýmaǵyna amerıkalyq ıadrolyq qarýdy ornalastyrý máselesi boıynsha Vashıngtonmen kelissózder bastaǵanyn habarlaǵan edi. Kelissózder AQSh-tyń Eýropadaǵy áskerı qatysýyn qysqartý aıasynda júrgizilip jatyr.
Eske salaıyq, buǵan deıin Lıtva premer-mınıstri bastaǵan el úkimeti otstavkaǵa ketken bolatyn.
Aıta ketelik Lıtva NATO-nyń ıadrolyq tejeý júıesine qosylýǵa nıetti.
