Lıtva úkimeti otstavkaǵa ketti
ASTANA. KAZINFORM – Premer-mınıstr Gıntaýtas Palýkas qyzmetinen ketý týraly sheshim qabyldaǵannan keıin Lıtva úkimeti otstavkaǵa ketti, dep habarlaıdy Kazinform mınıstrler kabınetiniń baspasóz qyzmetine silteme jasap.
— Lıtva Respýblıkasynyń 19-shy úkimetiniń otstavkaǵa ketkenin habarlaımyn. Men de Premer-mınıstr qyzmetinen ketý týraly sheshim qabyldadym, - dedi Palýkas kabınet otyrysynda.
Lıtva konstıtýtsııasyna sáıkes, Premer-mınıstr qyzmet ornyn bosatqannan keıin úkimet te otstavkaǵa ketedi. Biraq prezıdent mınıstrlerge jańa koalıtsııa men úkimet qurylǵanǵa deıin ýaqytsha jumys isteýdi tapsyra alady.
Aıta keteıik, Gıntaýtas Palýkasqa sybaılas jemqorlyqqa qatysty aıyptaýlar mamyr aıynyń sońynda Laisvės TV jýrnalıstik YouTube arnasy men Siena jýrnalıstik zertteý ortalyǵynyń birlesken zertteýleri jarııalanǵannan keıin kele bastady.
Alǵashqy jýrnalıstik materıal jarııalanǵannan keıin qyzmettik etıka jónindegi bas komıssııa óz betinshe tekserý jumystaryn bastady. Al Palýkas jýrnalısterdiń jarııalanymdaryn «qısynsyz» dep atady jáne uzaq ýaqyt boıy múddeler qaqtyǵysy týraly barlyq aıyptaýdy joqqa shyǵaryp, olardy saıası básekelesteriniń shabýyly dep túsindirdi.
24 shildede Lıtva prezıdenti premer-mınıstrge halyqtyń suraqtaryna jaýap berip, jumysyn jalǵastyrý týraly oılanýǵa eki apta ýaqyt berdi. Sodan keıin Palýkas «uzaq josparlanǵan» eki aptalyq demalysty jarııalady.
Eske sala keteıik, osyǵan deıin dúısenbide Lıtva úkimeti otstavkaǵa ketetini habarlanǵan bolatyn.