Lıtva prezıdenti mingen ushaq dronnyń kesirinen der kezinde qona almaı qaldy

ASTANA.KAZINFORM - Lıtva prezıdenti Gıtanas Naýseda mingen ushaq Vılnıýske birden qona almady. Áldebir dron týraly aqparatqa baılanysty ol aınalyp ushyp, qaýipsiz qoný sátin kútýge májbúr boldy, dep habarlaıdy Kazinform agenttiginiń menshikti tilshisi.

2 qyrkúıek kúni keshke Vılnıýs áýejaıynyń qaýipsizdik qyzmeti Air Navigation kompanııasyna Lepkalnıs aýdanynda kúdikti dron baıqalǵany týraly habarlady. Osyǵan baılanysty áýejaıda ushý-qoný ýaqytsha toqtatyldy. Dronnyń qaýipsiz ekeni belgili bolǵan soń, áýe qozǵalysy qaıta jandandy, dep jazady jergilikti BAQ.

«Kólik jáne kommýnıkatsııa mınıstrliginiń sońǵy aqparatyna sáıkes, dron jarnamalyq maqsatta kóterilgen, biraq belgilengen talaptar oryndalmaǵan. Qazir tıisti qyzmetter oqıǵanyń mán-jaıyn anyqtap jatyr. Sońǵy aqparat túskende, bul týraly jurtshylyq habardar bolady. Áýe qozǵalysy salasynda qaýipsizdik erejeleri qatań qadaǵalanady, sondyqtan mınıstrlik jaqyn arada áýejaı ókilderin shaqyrady. Olar qaýipsizdik sharalaryn jáne bolashaqqa arnalǵan josparlardy baǵalaıdy, neni jaqsartý kerektigin anyqtaıdy», - delingen habarlamada.

Delfi málimetinshe, 3 qyrkúıekke qaraǵan túni prezıdent Helsınkıden ushyp kelip, Eýropa chempıonaty aıasyndaǵy Lıtva basketbol quramasynyń oıynyn tamashalaǵan, sonymen qatar resmı kezdesýler ótkizgen.

Osyǵan deıin Frantsııada órt sóndirýshi tikushaqtyń toǵanǵa qulaǵany týraly jazdyq.