Lıtva premer-mınıstri jemqorlyqqa qatysty daýly oqıǵadan keıin otstavkaǵa ketti

ASTANA. KAZINFORM – Jaqynda sybaılas jemqorlyq daýynan keıin eki aptalyq demalysqa shyqqan Lıtva premer-mınıstri Gıntaýtas Palýkas bul qyzmetten, sondaı-aq Lıtva sotsıal-demokratııalyq partııasynyń tóraǵasy qyzmetinen ketti, dep habarlaıdy Kazinform DW-ge silteme jasap.

Gıntaýtas Palýkas 2024 jyldyń jeltoqsanynan beri Lıtva premer-mınıstri qyzmetin atqardy. 

Lıtva konstıtýtsııasyna sáıkes, premer-mınıstr otstavkaǵa ketkennen keıin búkil úkimet otstavkaǵa ketedi. Biraq prezıdent mınıstrlerge jańa koalıtsııa men úkimet qurylǵanǵa deıin ýaqytsha jumys isteýdi tapsyra alady. 

Premer-mınıstrge sybaılas jemqorlyqqa qatysty aıyptaýlar mamyr aıynyń sońynda Laisvės TV jýrnalıstik YouTube arnasy men Siena jýrnalıstik zertteý ortalyǵynyń birlesken zertteýleri jarııalanǵannan keıin kele bastady. Onda Palýkas pen onyń isker seriktesi 2024 jyldyń qańtarynda qurǵan Granis kompanııasy burynǵy premer-mınıstr bolyp turǵan kezde ILTE memlekettik damý bankinen 200 myń eýro jeńildetilgen nesıe alǵany aıtylǵan. 

Sodan keıin Palýkas ózi basqarǵan Sagerta kompanııasyna kásipker Darıýsh Vılchınskımen baılanysy bar Uni Trading kompanııasynan júzdegen myń eýro kóleminde nesıe aldy jáne qaıtarmady dep aıyptaldy. 2012 jyly Palýkas dál sol kásipkerdiń kompanııasynan 223 myń eýroǵa úı satyp alǵan-mys. Sol jyly kıprlik kompanııa bolashaq premer-mınıstrge Vılnıýstegi páterdi astanalyq ákimshilikte jumys istep júrgende ózi qurǵan ýchaskede naryqtyq emes baǵamen satty. 

2024 jyly qurylǵan jáne premer-mınıstrdiń ápkesi Vırdjınııa Paltsoýkas basqaratyn Dankora kompanııasynyń Drýkaı aýylynda elektr kólikterin zarıadtaý ınfraqurylymyn damytýǵa EO-dan 200 myń eýro jeńildetilgen nesıe alǵany jáne Garni kompanııasynan jabdyq satyp alǵany týraly jýrnalısterdiń aqparatynan keıin oǵan qatysty daýly oqıǵa órshı tústi. 

Alǵashqy jýrnalıstik materıal jarııalanǵannan keıin qyzmettik etıka jónindegi bas komıssııa óz betinshe tekserý jumystaryn bastady. Palýkastyń ózi jýrnalısterdiń jarııalanymdaryn «qısynsyz» dep atady jáne uzaq ýaqyt boıy múddeler qaqtyǵysy týraly barlyq aıyptaýdy joqqa shyǵaryp, olardy saıası básekelesteriniń shabýyly dep túsindirdi. 

24 shildede Lıtva prezıdenti premer-mınıstrge halyqtyń suraqtaryna jaýap berip, jumysyn jalǵastyrý týraly oılanýǵa eki apta ýaqyt berdi. Sodan keıin Palýkas «uzaq josparlanǵan» eki aptalyq demalysyn jarııalady. 

Eske salsaq, buǵan deıin Lında ıAkkarıno X áleýmettik jelisiniń bas dırektory qyzmetinen ketkenin jazǵan edik.