Lıtva NATO-nyń ıadrolyq tejeý júıesine qosylýǵa nıetti
ASTANA. KAZINFORM – Lıtva NATO-nyń ujymdyq ıadrolyq tejeý júıesine qosylýdy josparlap otyr. Bul týraly el prezıdenti Gıtanas Naýseda Berlınde ótken baspasóz máslıhatynda málimdedi, dep habarlaıdy DW.
Lıtva basshysynyń aıtýynsha, úkimet birneshe kún buryn Konstıtýtsııaǵa ózgeris engizý týraly bastama kótergen. Túzetýler el aýmaǵynda ıadrolyq qarýdy ornalastyrýǵa qatysty qoldanystaǵy shekteýdi alyp tastaýǵa múmkindik beredi.
– Bul ózgeris Lıtvaǵa NATO-nyń ujymdyq ıadrolyq tejeý sharalaryn qoldaýǵa jáne olarǵa qatysýǵa jol ashady. Alaıda bul bastamanyń agressııaǵa nemese shıelenisti ýshyqtyrýǵa esh qatysy joq, – dedi Gıtanas Naýseda.
Sonymen qatar ol qazirgi ýaqytta Lıtva aýmaǵyna ıadrolyq qarý ornalastyrý jóninde naqty jospar joq ekenin atap ótti.
Germanııa kantsleri Frıdrıh Merts Lıtvanyń bul ustanymyna qurmetpen qaraıtynyn aıtty.
– Baltyq elderiniń qaýipsizdigi – Germanııanyń da qaýipsizdigi. Biz osy ustanymdy sóz júzinde ǵana emes, is júzinde de basshylyqqa alamyz, – dedi Germanııa kantsleri.
Berlındegi kezdesýge Lıtva prezıdentinen bólek, Germanııa kantsleri Frıdrıh Merts, Estonııa premer-mınıstri Krısten Mıhal jáne Latvııa prezıdenti Edgars Rınkevıchs qatysty.
Aıta keteıik, jaqynda Lıtva úkimeti premer-mınıstrmen birge otstavkaǵa ketken bolatyn.
