Lıtva dúkenderi taýardy keri qaıtaratyndarǵa jańa salyq túrin engizbekshi

ASTANA.KAZINFORM — Lıtva dúkenderi taýarlardy qaıtarý úshin salyq engizýdi qarastyryp otyr, bul ózgerister satyp alýshylardyń quqyǵyna aıtarlyqtaı áser etýi múmkin, dep jazdy Belta.

Sońǵy jyldary ınternet arqyly satyp alynǵan taýarlardy qaıtarý kólemi tez ósip barady, dep atap kórsetedi basylymdar. Bul Lıtvadaǵy kásipkerler úshin eleýli qıyndyq týdyryp otyr, sondyqtan keıbir saýda oryndary taýarlardy qaıtarýǵa salyq engizýdi josparlap otyr.

Osy tólemdi engizýdiń maqsaty — ımpýlsıvti satyp alýlardy azaıtý, keri logıstıkaǵa ketetin shyǵyndy tómendetý jáne «úıde kıip kórý» ádisin shekteý. Keıbir lıtvalyq satýshylar bul tájirıbeni qazirdiń ózinde qoldana bastaǵan. 

Lıtvanyń Menedjment jáne ekonomıka ýnıversıteti (ISM) sarapshysy Aýshra Paýkshtıte atap ótkendeı, eger 2019 jyly elektrondyq saýdada satyp alynǵan ár 12 taýardyń 1-i ǵana qaıtarylsa, qazir ár 6-dan 1 taýar qaıtarylady, al arzan kıim brendterinde ár ekinshi taýar qaıtarylady. Álemde taýarlardy qaıtarýdyń jalpy quny trıllıon dollardan asty.

Paýkshtıte sonymen qatar: «Sandar kórsetkendeı, sońǵy bes jyl ishinde taýarlardy qaıtarýdyń eń úlken sekirisi 2021 jyly boldy. Pandemııa bizge ınternet-dúkenderde kóp zatty sebetke salýdy úıretti. Qazirgi tańda birneshe modeldi, bes túrli tústi alyp, olardy úıde kórý — múlde qalypty jaǵdaı. Kıip kórý bólmesi úıge kóship keldi» dedi ol. 

Eske sala keteıik, buǵan deıin Lıtva úkimeti otstavkaǵa ketkenin jazǵan edik.