Lıtva Belarýsten ushyp kelgen sharlarǵa baılanysty tótenshe jaǵdaı jarııalady

ASTANA. KAZINFORM — Lıtva úkimeti kórshi Belarýsten aýa raıyn baqylaýǵa arnalǵan sharlar túrinde kontrabandalyq temekilerdi alyp ótýge qatysy bar birneshe zańsyz shekara buzý jaǵdaıyna jaýap retinde «el aýmaǵynda tótenshe jaǵdaı» jarııalady. Bul týraly VVS jazdy.

Lıtva Premer-mınıstri Inga Rýgınıene bul sharlardyń áýe keńistigine enýin Belarýs tarapynan jasalǵan «gıbrıdtik shabýyl» dep aıyptap, onyń ulttyq qaýipsizdikke jáne azamattyq avıatsııaǵa naqty qaýip tóndirip otyrǵanyn aıtty.

Resmı tulǵalardyń aıtýynsha, tek bıyldyń ózinde kontrabandamen baılanysty shamamen 600 shar jáne 200-ge jýyq dron Lıtva áýe keńistigine kirgen, bul Vılnıýs áýejaıynyń birneshe ret jabylýyna ákelgen.

Al Belarýs basshysy Aleksandr Lýkashenko bul zańsyz ótýlerge óz eliniń qatysy joǵyn málimdep, máseleni EO men NATO-ǵa múshe Lıtvanyń «saıasılandyryp otyr» dep aıyptady.

Lıtvanyń bul jolǵy «tótenshe jaǵdaı rejımin» engizý sheshimi 2022 jyly Reseı Ýkraınaǵa tolyqqandy basyp kirgennen keıin engizilgen tótenshe jaǵdaıdan bir saty tómen. Bul rejım qarýly kúshterge jyldamyraq jáne tıimdi áreket etý úshin qosymsha ókilettikter beredi.

Lıtva prezıdenti Gıtanas Naýseda sharlar arqyly tóngen qaýip «Lıtvadaǵy jaǵdaıdy destabılızatsııalaýǵa baǵyttalyp ádeıi jasalǵan áreket ekenine» dálel kóp ekenin aıtty.

Eýropanyń birneshe eli buǵan deıin Reseı tarapynan kelip jatqan túrli qaýipterge tap bolǵan-dy. EO buny «gıbrıdtik naýqan» dep atap, oǵan dıversııa, mańyzdy ınfraqurylymǵa zııan keltirý jáne mańyzdy nysandar mańynda drondardyń ushýy kiretinin málimdedi.

Lıtva buǵan deıin de Belarýsti osyndaı arandatýshylyq áreketter boıynsha aıyptaǵan. Tórt jyl buryn Taıaý Shyǵystan shyqqan myńdaǵan zańsyz mıgrant Belarýs arqyly Lıtvaǵa ótken edi.

Aıta keteıik, Taıland-Kambodja shekarasynda qaqtyǵys qaıta bastaldy.

Sondaı-aq Aýǵanstannyń Kandagar provıntsııasyndaǵy Pákistanmen shekaralas Spın Boldak qalasyna jaqyn jerde tórt saǵatqa sozylǵan urys boldy.