Lıtva-Belarýs shekarasynan mıgranttardyń taǵy bir jerasty týnneli tabyldy
ASTANA. KAZINFORM – Lıtvanyń shekarashylary Belarýspen aradaǵy memlekettik shekara astynan zańsyz ótýge arnalǵan bolýy múmkin taǵy bir jerasty týnnelin anyqtady. Bul osy jyldyń basynan beri tirkelgen osyndaı on ekinshi jaǵdaı, dep habarlaıdy Deutsche Welle.
LRT teleradıokompanııasynyń málimetinshe, týnnel Drýskınınkaı mýnıtsıpalıtetine qarasty Latejerıs aýylynyń mańynan tabylǵan. Jerasty ótkelin Polsha bergen arnaıy jabdyqtyń kómegimen anyqtaý múmkin bolǵan.
Shekara qyzmetiniń málimetinshe, týnnel shamamen 1,5 metr tereńdikte qazylǵan. Onyń qabyrǵalary bórene men taqtaılar arqyly bekitilgenimen, qurylys tolyq aıaqtalmaǵan.
Belarýs jaǵyndaǵy kireberisi arnaıy búrkemeleý matasymen jasyrylǵan. Týnnel memlekettik shekara syzyǵynan Lıtva aýmaǵyna qaraı shamamen tórt metrge deıin sozylǵan, alaıda Lıtva jaǵyndaǵy shyǵaberis áli jasalmaǵan.
Lıtva bıliginiń pikirinshe, mundaı jerasty ótkelderi mıgranttardy shekara arqyly zańsyz ótkizý úshin paıdalanylýy múmkin.
Týnnel anyqtalǵannan keıin memlekettik shekarany zańsyz kesip ótý deregi boıynsha tergeý bastaldy. Lıtva zańnamasyna sáıkes, mundaı qylmys úshin eki jylǵa deıin bas bostandyǵynan aıyrý jazasy qarastyrylǵan.
Eske sala ketsek, buǵan deıin Ispanııada marokkolyq esirtki karteline tıesili jerasty týnneliniń tabylǵany habarlanǵan.
