Lıtva azamattaryn Izraılden evakýatsııalaý bastaldy

ASTANA.KAZINFORM —  2025 jylǵy 17 maýsym kúni Izraıldiń Tel-Avıv qalasynda Lıtva azamattaryn evakýatsııalaý bastaldy, dep habarlaıdy Anadoly. 

Baltyq elderiniń azamattary Izraılden Iordanııaǵa úsh avtobýspen jetkizilip jatyr. Budan keıin olar azamattyq ushaqtarmen Vılnıýs qalasyna ushyrylmaq.

– Biz kórshi elderge de kómektesýdi usyndyq. Avtobýsta áli bos oryndar bar, sondyqtan búkil reıs tolady dep úmittenemiz, – dedi Ulttyq daǵdarysty basqarý ortalyǵynyń basshysy Vılmantas Vıtkaýskas.

Onyń aıtýynsha, tústen keıin barlyq jolaýshy shekaradaǵy ótkizý beketine jetedi dep kútilýde.

Málimetke sáıkes, Izraılden evakýatsııaǵa 100-den astam adam tirkelgen, olardyń basym bóligi — Lıtva azamattary. Irannan evakýatsııalaýǵa qatysty ótinishter túspegen.

13 maýsymda Izraıl Iran Respýblıkasynyń túrli qalalarynda ornalasqan ıadrolyq nysandar men áskerı basshylyq ókilderiniń ornalasqan oryndaryna aýqymdy áýe soqqylaryn jasady.

Shabýyldar saldarynan Iran Qarýly kúshteri Bas shtabynyń bastyǵy, Islam revolıýtsııasy saqshylary korpýsynyń bas qolbasshysy, birneshe joǵary shendi áskerı qyzmetker jáne ıadrolyq zertteýler salasyndaǵy 9 maman qaza tapty. Beıbit turǵyndar arasyndaǵy jalpy adam shyǵyny 224 adamǵa jetken.

Jaýap retinde Iran Izraıl aýmaǵyna ballıstıkalyq zymyrandarmen soqqy jasady. Resmı derekterge sáıkes, bul shabýyldan 24 adam qaza taýyp, 500-den astamy jaraqat aldy.

Oqıǵaǵa baılanysty Túrkııa da qosa alǵanda, birqatar elder Izraıldiń áreketin qatań aıyptady. 

Aıta ketelik Qytaı Izraıldegi azamattaryn elden ketýge shaqyrǵan edi.