Lıtva astanasynda sýretshi Raýza Eralıevanyń kórmesi ashyldy
VILЬNıÝS. QazAqparat - 14 mamyrda Vılnıýstiń eski qalasyndaǵy bogemalyq oram - Ýjýpıste, «Jahandyq ómirdegi zamanaýı Qazaqstan mádenıeti» jobasyn is-asyrý sheńberinde, belgili qazaqstandyq sýretshisi Raýza Eralıevanyń kórmesi ashyldy, dep habarlaıdy QazAqparat Lıtvadaǵy Qazaqstannyń elshiligine silteme jasap.
Kórmeniń ashylýyna resmı tulǵalar, bıznes jáne akademııalyq toptardyń ókilderi, mádenıet qaıratkerleri, sondaı-aq Lıtvada tirkelgen dıplomatııalyq mıssııalarynyń músheleri qatysty.
Lıtvadaǵy Qazaqstannyń elshisi V.Temirbaev festıvaldyń ashylý rásiminde sóılegen sózinde qazaqstandyq ónerdiń kópshilikke taralýy jáne elimizdiń mádenı áleýetiniń damýyndaǵy dınamızmi «Rýhanı jańǵyrý» baǵdarlamasynyń jáne «Uly dalanyń jeti qyry» atty Elbasynyń maqalasy arqyly oıdaǵydaı iske asyrylyp jatqanyn attap ótti.
Óz kezeginde, lıtva jurtshylyǵyn qazaqstandyq sýretshiniń jarqyn jáne erekshe stıli tańǵaldyrdy.
«Meni Raýza Eralıevanyń kórmesi qatty tańdandyrdy. Men sýretshiniń paıdalanǵan jarqyn boıaýlaryna tańǵaldym, kórmege kelgen qonaqtarǵa qazaq halqynyń mádenıetine tán, keremet beıneler men formalardy kórsetkenimizge óte qýanyshtymyn», - dep Ýjýpıs óner-ınkýbatorynyń jetekshisi Ieva Matýlıonıte kórme týraly pikirimen bólisti.
Sonymen birge Ieva Matýlıonıte qazaqstandyq sýretshilerimen mádenı-gýmanıtarlyq yntymaqtastyqty nyǵaıtýǵa qyzýǵýshylyǵyn bildirip, jas qazaqstandyqtardy óner ınkýbatordyń jumysyna qatysýǵa shaqyrdy.
Aıta keterligi, Ýjýpıs - Lıtvanyń ǵana emes, búkil aımaqtyń basty kórikti jerleriniń biri. 1997 jylǵy 1 sáýirde, oramanyń turǵyndary ásirese sýretshiler men aqyndar ony «Ýjýpıs erkin respýblıka» dep jarııalady. «Memleket ishindegi memleket» Ýjýpısty Parıjdegi ornalasqan Monmartrmen jáne Kopengagenniń Krıstıanııasymen uqsastyryp bir qatarǵa qoıady. Atalǵan jer Lıtva astanasyndaǵy týrıster kóp baratyn úshinshi orynǵa ıe, sondaı-aq Vılnıýstiń Eski qalasy ıÝNESKO-nyń Búkilálemdik mura tizimine kiredi.
«Roza Eralıevanyń sýretter kórmesin Ýjýpıs Respýblıkamyzda ótkizý biz úshin úlken qurmet. Jalpy alǵanda, lıtvalyq aýdıtorııa qazaqstandyq sýretshilerdiń jumysymen tanys bolmaǵan, al osy sýret kórmesi Qazaqstannyń qazirgi óneriniń jarqyn úlgisi bolyp tabylatynyn atap ótkim keledi.
Osydan bir jyl buryn Qazaqstan elshiligimen birlesip, qazaq tilinde Ýjýpıs Respýblıkasynyń Konstıtýtsııasynnyń stendin ashtyq. Aıta ketý kerek mátindi jazǵan kezde latyn grafıkasy qoldanylǵan. Bizdiń yntymaqtastyǵymyzdy odan ári nyǵaıýyna qýanyshtymyn», - dep málimdedi Ýjýpıs Respýblıkasynyń Premer-mınıstri Sakalas Gorodetskıs.
Vılnıýsten keıin kórme Kaýnas jáne Klaıpeda qalalarynda ótedi. Lıtvadan keıin sýretshiniń týyndylary ári qaraı Latvııanyń Lıepaıa jáne Rıga galereıalaryna jiberiledi.
Osylaısha, Qazaqstan kıno kúnderi (Vılnıýs, Kaýnas, Klaıpeda), qazaqstandyq-kanadalyq «Equus: jylqy tarıhy» atty derekti fılmi, Vılnıýs ýnıversıtetinde ótken «Arqaıym» neo-etno-folklorlyq tobynyń kontserti, sondaı-aq kóktemgi jańarý - Naýryz meıramyna arnalǵan saıası mekemelerge jáne dıplomatııalyq korpýsqa uıymdastyrylǵan resmı qabyldaýy jáne Raýza Eralıevanyń sýretter jınaǵynyń kórsetilimimen elshiliktiń «Lıtvadaǵy Qazaqstan kóktemi» barysynda uıymdastyrylǵan mádenı jobasyn aıaqtaıdy.
