Lıtva 2032 jyldan bastap er azamattardy jappaı áskerge shaqyrady
ASTANA. KAZINFORM — Lıtva Memlekettik qorǵanys keńesi 2032 jyldan bastap er azamattardy mindetti áskerı qyzmetke jappaı shaqyrýdy engizý týraly sheshim qabyldady, dep habarlaıdy Kazinform agenttiginiń menshikti tilshisi LRT basylymyna silteme jasap.
— 2032 jyldan bastap azamattardy jappaı áskerı qyzmetke shaqyrý týraly sheshim qabyldadyq, – dep málimdedi Lıtva Prezıdenti Gıtanas Naýseda.
Qazirgi ýaqytta Lıtvada áskerge ishinara shaqyrý júıesi qoldanylady. Jyl saıyn 5 myńnan astam adam merzimdi áskerı qyzmetke alynady. Jalpyǵa birdeı shaqyrý tártibine kóshkende demografııalyq ahýal men densaýlyǵyna baılanysty áskerı qyzmetke jaramsyz jastardyń úlesi eskerilip, jyl saıyn shamamen 7,5 myń jigitti áskerge shaqyrý kózdelgen. Áıelder úshin áskerı qyzmet erikti túrde jalǵasady.
Prezıdent Gıtanas Naýsedanyń aıtýynsha, 2032 jylǵa deıin áskerge shaqyrylatyndar sanyn arttyrýǵa qajetti ınfraqurylymdy ázirlep, qosymsha nusqaýshylar daıarlaý josparlanǵan. Olardyń sany 300-350 adam shamasynda bolady. Bir nusqaýshyny daıyndaýǵa 3-4 jyl qajet.
Budan bólek, Lıtva áskerge shaqyrylatyn jastardy oqytý men áskerı rezervti daıarlaý isin qatar alyp júrýi kerek. Jalpyǵa birdeı áskerı qyzmetke kóshýge daıyndyq shyǵyny shamamen 120 mln eýroǵa baǵalanyp otyr.
Memlekettik qorǵanys keńesiniń otyrysynda áskerı qyzmetti óteý baǵyttaryn keńeıtý týraly da sheshim qabyldandy. Áskerge shaqyrylǵandar dron basqarýdy úırenip, shekara qyzmeti men órt sóndirý-qutqarý bólimshelerine kómek kórsete alady.
Lıtvada merzimdi áskerı qyzmetke ishinara shaqyrý 2015 jyly qaıta jandandy. Al 2008 jyly mindetti áskerı qyzmet toqtatylǵan edi. Jalpyǵa birdeı áskerı mindetti engizý týraly sheshim óńirdegi qaýipsizdikke tónetin qaterlerdi uzaq merzimge baǵalaý nátıjesinde qabyldandy. LRT basylymynyń habarlaýynsha, Premer-mınıstr Mındaýgas Sınkıavıchıýs úkimet jalpyǵa birdeı áskerı shaqyrýdy erterek engizýdi kózdegenin, alaıda áskerı mamandar qajetti jaǵdaılardy tolyq daıyndaý úshin bul merzimdi 2032 jylǵa shegerýdi usynǵanyn aıtty.
Buǵan deıin Lıtva, Latvııa men Estonııa jaıaý áskerge qarsy mınaǵa tyıym salý konventsııasynan shyqqanyn habarlaǵan bolatynbyz.
