Lıtva 200 lıtrden artyq janarmaıy bar júk kólikterin kirgizbeı jatyr
ASTANA. KAZINFORM – Lıtva bıligi Reseı men Belarýsten kelgen, bagynda 200 lıtrden artyq janarmaıy bar 20 júk kóligi men 2 avtobýsty el aýmaǵyna kirgizbeı qoıdy. Bul týraly Lıtvanyń keden departamenti málimdedi, dep jazdy TASS.
Vedomstvo habarlaýynsha, atalǵan shekteý 3 mamyrdan bastap kúshine engen.
– Tyıym kúshine engennen keıin belgilengen normany buzǵan 20 júk kóligi men 2 avtobýs Lıtva aýmaǵyna ótkizilmedi, – delingen habarlamada.
Bul shekteý Reseı men Belarýske qarsy engizilgen ulttyq sanktsııalarǵa qosymsha shara retinde qabyldanǵan. Alaıda talap lıtvalyq TOKS kompanııasynyń avtobýsyna da qoldanyldy.
Kompanııa júrgizýshisi avtobýsty Lıtva aýmaǵynda tolyq janarmaımen toltyryp, Belarýske baryp qaıta oralmaq bolǵan. Biraq baktaǵy janarmaı kólemi 200 lıtrden asyp ketkendikten, avtobýs shekaradan ótkizilmegen.
TOKS kompanııasy másele Belarýs aýmaǵynda janarmaı quıýda dep eseptegen. Alaıda keden organdary janarmaıdyń qaı elde quıylǵanynyń mańyzy joq ekenin túsindirgen.
Nátıjesinde avtobýs «artyq» janarmaıdy jumsaý úshin Belarýs aýmaǵynda qosymsha júrýge májbúr bolǵan.
Lıtvanyń keden departamenti bul shekteýdi engizýge ózi bastamashy bolǵanyn málimdedi. Óıtkeni, júk kólikterindegi «artyq janarmaı» keıin zańsyz satylymǵa shyǵarylady.
Keden qyzmetiniń esebine sáıkes, Lıtva aýmaǵyna táýligine Reseı men Belarýs nómirli shamamen 200 júk kóligi kiredi. Eger ár kólikten orta eseppen 500 lıtr dızel otyny zańsyz satylsa, memleket aı saıyn 2,2 mln eýro kóleminde salyqtan qaǵylýy múmkin.
Aıta keteıik, Qazaqstan men Lıtva kólik-logıstıka salasyndaǵy yntymaqtastyqty kúsheıtpek.
