Lıtsenzııasyz plastıkalyq ota jasaǵan mekemege zań qandaı jaza kesedi
ASTANA. KAZINFORM – Densaýlyq saqtaý mınıstrligi Kazinform saýalyna joldaǵan jaýabynda tıisti sertıfıkattar men lıtsenzııasyz plastıkalyq ota jasaǵan mekemeniń zań aldyndaǵy jazasy qandaı bolatynyna túsinik berdi.
Jaýapta Kásipkerlik týraly, Halyq densaýlyǵy jáne densaýlyq saqtaý júıesi týraly kodekster Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıtetine turǵyndardan plastıkalyq otamen baılanysty shaǵym tússe, jospardan tys tekserý júrgizýge ókilet beretini aıtylǵan. Sondaı-aq onyń aýmaqtyq departamentteri medıtsınalyq qyzmet kórsetetin uıymdardy memleket atynan baqylaıdy. Mundaı jospardan tys tekserý júrgizýge mynalar negiz bolýy múmkin:
– adamnyń ómirine nemese densaýlyǵyna zııan keltirý, zııan keltirý qaýpiniń naqty faktileri boıynsha prokýratýranyń nusqaýy;
– adamnyń ómiri men densaýlyǵyna zııan keltirýdiń naqty faktileri, sondaı-aq adam ómiri men densaýlyǵyna zııan keltirýge ákep soǵatyn Qazaqstan Respýblıkasy zańnamasynyń talaptaryn buzý týraly memlekettik organdardyń ótinishteri;
– Qazaqstan Respýblıkasynyń Qylmystyq is júrgizý kodeksinde kózdelgen negizder boıynsha qylmystyq qýdalaý organynyń nusqaýy.
«Jospardan tys tekserý nátıjeleri boıynsha osy qyzmet túrine sertıfıkaty jáne (nemese) lıtsenzııasy joq adam zańsyz medıtsınalyq qyzmetti anyqtaǵan jaǵdaıda Ákimshilik quqyq buzý týraly kodekstiń 424-baby boıynsha ákimshilik shara qoldanylady. Naqtyraq aıtsaq, jeke tulǵalarǵa 5 AEK (18 460 teńge -red.) mólsherinde, laýazymdy adamdarǵa 15 AEK (55 380 teńge) mólsherinde, zańdy tulǵalarǵa 20 AEK-ten (73 840 teńge) 70 AEK (258 440 teńge) mólsherine deıin aıyppul salýǵa ákep soǵady. Ákimshilik jaza qoldanylǵannan keıin bul áreket bir jyl ishinde qaıtalansa, jeke tulǵalarǵa densaýlyq saqtaý salasyndaǵy mamannyń kýáliginen aıyra otyryp, laýazymdy tulǵalar men sýbektilerge 30 AEK (110 760 teńge) mólsherinde aıyppul salynady. Ákimshilik quqyq buzýshylyq jasaý nátıjesinde alynǵan tabysy tárkilenip, 65 AEK-ten 700 AEK-ke deıingi mólsherde aıyppul salýǵa ákep soǵady. Densaýlyqqa ortasha jáne aýyr dárejedegi zııan keltirgeni úshin qylmystyq jaýapkershilik kózdelgen», - dep jazylǵan mınıstrlik jaýabynda.
