Lıtsenzııasyz marganets óndirgen kásipker 5 jyldan asa merzimge sottaldy

ASTANA. KAZINFORM — Ulytaý oblysynyń prokýratýrasy Ekonomıkalyq tergep-tekserý departamentimen birlesip, oblys aýmaǵynda marganets kenin zańsyz óndirýdiń qylmystyq shemasyn anyqtady. 

Qostanaı oblysynyń 50 jastaǵy turǵyny 2020–2023 jyldar aralyǵynda jer qoınaýyn paıdalanýǵa lıtsenzııasy men kelisimsharty bolmaǵanyna qaramastan «Shyǵys Qarajal» ken ornynda marganets kenin zańsyz óndirýdi uıymdastyrǵan. Sonymen qatar, qolma-qol aqshaǵa aınaldyrý jáne jalǵan mámileler jasasý arqyly paıdaly qazbalardy satýdan túsken qylmystyq jolmen tabylǵan aqshalaı qarajatty zańdastyrǵan.

Atalǵan kezeńde 16 myń tonnadan astam ken jóneltilip, memleketke 1,3 mlrd teńgeden astam zalal keltirilgen.

Qylmystyq qyzmettiń nátıjesinde jáne óńdelgen temir-marganets kenin el ishinde jáne shetelge satý arqyly 3,5 mlrd teńgeden astam paıda tapqan.

Ulytaý oblysy sotynyń úkimimen kináli adam 5 jyl 4 aı merzimge bas bostandyǵynan aıyrylyp, jer qoınaýyn paıdalaný salasyndaǵy qyzmetpen aınalysý quqyǵynan 5 jyl merzimge aıyryldy. Memleket kirisine 4,8 mlrd teńge óndirilip, sondaı-aq qylmystyq jolmen tabylǵan qarajatqa satyp alynǵan 3 jeńil jáne 2 júk avtokóligi tárkilendi.

Sot úkimi zańdy kúshine endi.

Aıta ketelik temir rýdasy tórt jyl boıy zańsyz óndirilip, shetelge shyǵarylyp kelgeni týraly jazǵan edik.