Lıtsenzııasy bardyń bári qurylys sala almaıdy: jańa tsıfrlyq júıe iske qosylady
ASTANA. KAZINFORM — Qazaqstanda qurylys jáne jobalaý uıymdarynyń biliktilik talaptaryna sáıkestigin tekseretin Lıtsenzıattardyń avtomattandyrylǵan tizilimi engiziledi. Júıe qurylys kompanııalarynyń naqty múmkindikterin, mamandaryn jáne óndiristik bazasyn baǵalaýǵa múmkindik beredi.
Ónerkásip jáne qurylys mınıstrligi baspasóz qyzmetiniń málimetinshe, búginde Qazaqstanda qurylys salasynda 80 myńǵa jýyq lıtsenzııa tirkelgen. Alaıda lıtsenzııanyń bolýy kompanııanyń qajetti resýrstarǵa ıe ekenin jáne jumystardy sapaly oryndaı alatynyn tolyq qamtamasyz etpeıdi. Osyǵan baılanysty «Atameken» Ulttyq kásipkerler palatasynyń alańynda Palata ókilderimen, onyń óńirlik fılıaldarymen jáne qurylys salasyndaǵy salalyq birlestiktermen kezdesý ótti. Kezdesý barysynda Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Murat Rysdáýletov qurylys salasyndaǵy lıtsenzıattardy tsıfrlyq baqylaý tetigin — Lıtsenzıattardyń avtomattandyrylǵan tizilimin (budan ári — Tizilim) tanystyrdy.
— Tizilimniń negizgi mindeti — qoldanystaǵy zańnama normalary sheńberinde lıtsenzııa ıeleriniń biliktilik talaptaryn turaqty túrde saqtaýyn qamtamasyz etý. Avtomattandyrylǵan tizilim qurylys jáne jobalaý uıymdarynyń belgilengen biliktilik talaptarynyń sáıkestigine tsıfrlyq monıtorıng júrgizýdi qamtamasyz etýge múmkindik beredi. Atap aıtqanda, tekserý barysynda bilikti mamandardyń jáne qajetti óndiristik bazanyń bolýyn rastaıtyn memlekettik tsıfrlyq júıelerdiń derekteri eskeriletin bolady, — delingen habarlamada.
Bul is júzinde qandaı ózgerister ákeledi?
Vedomstvo atap ótkendeı, eń aldymen, tapsyrys berýshiler qurylys jáne jobalaý uıymdarynyń senimdiligin neǵurlym obektıvti baǵalaı alady. Merdigerdi tańdaý kezinde lıtsenzııanyń bolýy ǵana emes, kompanııanyń naqty múmkindikteri, jumys tájirıbesi men qyzmetiniń nátıjeleri de eskeriletin bolady. Adal jumys isteıtin uıymdar úshin bul qurylys jobalaryna qatysýdyń neǵurlym ashyq ári teń jaǵdaılaryn qalyptastyrady. Tizilimdi engizý qurylys naryǵynyń ashyqtyǵyn arttyrýǵa, sapasyz qurylys táýekelderin tómendetýge jáne nysandardyń ýaqytyly paıdalanýǵa berilýin qamtamasyz etýge baǵyttalǵan. Júıeni testilik rejımde iske qosý osy jyldyń qarasha aıyna josparlanǵan.
Osyǵan deıin «Halyqtyq qurylys» jobasynda tsıfrlyq teńge qoldanylýy múmkin ekenin jazǵanbyz.
