Lıtsenzııalyq týrnır: Jartylaı fınal men fınaldyq jekpe-jekter ótpeıdi
ASTANA. KAZINFORM - Italııanyń Býsto-Arsıtsıo qalasynda Parıj Olımpıadasynyń joldamasy sarapqa salynyp jatqan halyqaralyq týrnırde jartylaı fınaldyq básekeler men fınaldyq jekpe-jekter ótpeıdi.
Bul týraly KAZINFORM tilshisine suhbat bergen bokstan Qazaqstan ulttyq quramasynyń bas bapkeri Myrzaǵalı Aıtjanov aıtyp berdi.
«Bıylǵy bul týrnır burynǵy básekelerden ózgesheligimen este qalaıyn dep tur. Boksshylar altyn, kúmis júlde úshin sharshy alańǵa shyqpaıdy. Sebebi atalǵan týrnırde boksshylar Olımpıada joldamasyna talasyp jatyr. Ereje boıynsha ár salmaqtan jartylaı fınalǵa jetken 4 boksshy sol joldamany qanjyǵasyna baılaıdy. Joldama jeńip alǵan soń ary qaraı jekpe-jek bolmaıdy. Bul da durys sheshim bolar. Sondyqtan boksshylarymyz shırek fınaldan súrinbeı ótse boldy, joldamaǵa qol jetkizedi. Ary qaraı sharshy alańǵa shyqpaıdy», - dedi bas bapker.
Esterińizge sala keteıik, lıtsenzııalyq týrnırde 2024 jylǵy Parıj Olımpıadasynyń joldamalary sarapqa salynyp jatyr.
Atalǵan týrnırde Qazaqstan quramasy sapynda erlerden 6 boksshy, áıelderden 5 boksshy synǵa túsip jatyr.
Bylǵary qolǵap sheberleri erler arasynda 28, áıelder arasynda 21 joldamany sarapqa salady.
Týrnır 3 naýryzda bastalǵan bolatyn. 12 naýryzda máresine jetedi.
