Lıtsenzııalyq týrnır: Tórt balýanymyz joldamaǵa talasady

BІShKEK. KAZINFORM — Qyrǵyzstan astanasy Bishkek qalasynda kúres túrlerinen ótip jatqan lıtsenzııalyq týrnırde grek-rım kúresinen tórt balýanymyz jartylaı fınalǵa shyǵyp, Parıj olımpıadasynyń joldamasyna talasý múmkindigine ıe boldy.

60 keli salmaqta Aıdos Sultanǵalı shırek fınalda Tájikstan ókili Aslamdjon Azızovtan 2:1 esebimen basym túsip, jartylaı fınalǵa shyqsa, 67 kelidegi Meıirjan Shermahanbet shırek fınalda Ózbekstan sportshysy Abror Atabaevty 6:3 esebimen jeńdi.

Al 77 keli salmaqtaǵy ulttyq quramanyń tájirıbeli balýany, álem chempıonatynyń kúmis júldegeri Demeý Jadyraev 1/4 fınalda Túrkimenstan sportshysy Bazargeldi Ezımovty aıqyn basymdylyqpen utyp, qarsylasyn jarys jolynan taıdyrdy. 

Sonymen qatar, asa aýyr salmaqtaǵy Álimhan Syzdyqov shırek fınalda Túrkimenstan sportshysy Aıbekshazada Kýrraevty 9:0 esebimen utty.

Osylaısha lıtsenzııalyq týrnırge attanǵan bes balýanymyzdyń tórteýi jartylaı fınalǵa shyǵyp, Olımpıada joldamasyna bir qadam jaqyndady.

Ókinishke qaraı, 97 keli salmaqtaǵy Oljas Syrlybaı alǵashqy aınalymda Japonııa sportshysy ıÝrı Nakazatadan 1:2 esebimen ese jiberip, jarysty erte aıaqtady.

Atalǵan týrnırde grek-rım kúresinen Olımpıada oıyndarynyń 12 joldamasy sarapqa salynyp jatyr. Joldamany tek, fınalǵa shyqqan balýandar qanjyǵasyna baılaıdy.

Esterińizge sala keteıik, búgin Qazaqstan qorjynyna akademııalyq eskek esýden Parıj Olımpıadasynyń taǵy bir joldamasy túskenin jazǵan bolatynbyz. Ony Ońtústik Koreıanyń Chýndjý qalasynda ótip jatqan Azııa qurlyǵynyń lıtsenzııalyq jarysynda Vladıslav ıAkovlev jekeleı synda jeńip aldy.