Lıtsenzııalyq týrnır: Eki qazaq boksshy bir-birimen judyryqtasady

ASTANA. KAZINFORM – Italııanyń Býsto-Arsıtsıo qalasynda ótip jatqan lıtsenzııalyq týrnırde Sáken Bıbosynovtyń kelesi qarsylasy belgili boldy.

Endi Bıbosynov 10 naýryz kúni óziniń otandasy, qazaq boksshysy Azat Mahmetovpen judyryqtasady.

Mahmetov qazirgi tańda Bahreın eliniń atynan synǵa túsip júr. Ol buryn elde bolǵanda Qazaqstannyń 2 dúrkin chempıony atanǵan tájirıbeli boksshylardyń biri.

Aıta keteıik, keshe Sáken Bıbosynov lıtsenzııalyq týrnırdegi ekinshi jekpe-jegin ótkizip, Kenııa sportshysy Devıd Karancha Macharıany tóreshilerdiń sheshimimen jeńdi.

Parıj olımpıadasynyń joldamasy sarapqa salynyp jatqan týrnır 3 naýryzda bastalǵan bolatyn.

Jarys 12 naýryz kúni máresine jetedi. Atalǵan týrnırde erler arasynda 28, áıelder arasynda 21 joldama sarapqa salynyp jatyr. Qazaqstan quramasynan erlerden 6, áıelderden 5 boksshy joldamaǵa talasýda.