Lıtsenzııalyq týrnır: Nazym Qyzaıbaı búgin sharshy alańǵa shyǵady

ASTANA. KAZINFORM - Taılandtyń Bangkok qalasynda ótetin bokstan Olımpıadaǵa irikteý týrnırinde búgin el quramasynyń sapynan Nazym Qyzaıbaı (50 keli) sharshy alańǵa shyǵady.

Qazaqstandyq boksshy alǵashqy aınalymynda Nazym slovakııalyq Nıkol Dýrıkovamen kezdesedi. Qarsylasy - Slovakııa chempıony, 22 jasqa deııingi jastar arasynda Eýropa chempıonatynyń kúmis jáne qola júldegeri.

Jekpe jek Qazaqstan ýaqytymen 16:30-da bastalady.

Nazym Qyzaıbaı 1993 jyly dúnıege kelgen. 2014, 2016 jyldarda álem chempıony atansa, 2012 jyly kúmis medal aldy. Al, 2021 jyly Azııa chempıony tuǵyryna kóterildi.

Aıta ketsek, áıelder quramasynda Nazym Qyzaıbaıdan basqa Uljan Sársenbek (54 keli), Rımma Volosenko (60 keli), Natalıa Bogdanova (66 keli) men Valentına Halzova (75 keli) el namysyn qorǵaıdy.

Sondaı-aq erler quramasynda Muhamedsabyr Bazarbaıuly (63.5 keli) sharshy alańǵa shyǵady. 

Elimizdiń erler quramasy buǵan deıin Olımpıadanyń 6 joldamasyn jeńip aldy. Atap aıtqanda, Sáken Bıbosynov (51 keli), Mahmud Sabyrhan (57 keli), Aslanbek Shymbergenov (71 keli), Nurbek Oralbaı (80 keli), Aıbek Oralbaı (92 keli) jáne Qamshybek Qońqabaev (92 keliden joǵary) bar. 

Áıelder quramasynda byltyr qazan aıynda Qytaıda ótken Azıadada Karına Ibragımova Olımpıada oıyndaryna bokstan alǵashqy joldamaǵa ıe boldy.