Lıtsenzııalyq týrnır: Ekinshi boksshymyz jarys jolynan shyǵyp qaldy

ASTANA. KAZINFORM – Italııanyń Býsto-Arsıtsıo qalasynda ótip jatqan lıtsenzııalyq týrnırde búgin ekinshi boksshymyz jarys jolynan shyǵyp qaldy.

Naqtyraq aıtsaq, áıelder arasynda 60 kelide el namysyn qorǵap jatqan boksshymyz Rımma Volosenko tórtinshi jekpe-jeginde, ıaǵnı shırek fınalda Slovakııa sportshysy Mıroslava Jedınakovaǵa tóreshiler sheshimimen ese jiberdi.

Jerlesimiz osylaısha Parıj olımpıadasynyń joldamasyna synyq súıem jer qalǵanda súrindi.

Ol osyǵan deıin birinshi jekpe-jeginde Trınıdad Tobago eliniń ókili Tıanna Gýımen kezdesip, tóreshiler sheshimimen basym tússe, ekinshi aıqasynda vengrııalyq Petra Sabodan aılasyn asyrǵan edi. Al úshinshi jekpe-jeginde Ýrýgvaı sportshysy Kamılla Paolo Pıneırodan basym túsken bolatyn.

Sonymen qatar búgin sharshy alańǵa alǵash ret shyqqan Jaına Shekerbekova 1/16 fınalda Nıgerııa ókili Shýkýra Karımge ese jiberip, jarysty aıaqtaǵan bolatyn.

Parıj Olımpıadasynyń joldamasy sarapqa salynyp jatqan týrnır 3 naýryzda bastalǵan bolatyn. Jarys 12 naýryz kúni máresine jetedi. Atalǵan týrnırde erler arasynda 28, áıelder arasynda 21 joldama sarapqa salynyp jatyr. Qazaqstan quramasynan erlerden 6, áıelderden 5 boksshy joldamaǵa talasyp jatyr.