Lıtsenzııalyq týrnır: Búgin tórtinshi boksshymyz qarsylasyn shań qaptyrdy

ASTANA. KAZINFORM – Italııanyń Býsto-Arsıtsıo qalasyndaǵy Parıj Olımpıadasynyń joldamalary sarapqa salynyp jatqan týrnırde sharshy alańǵa shyqqan boksshylarymyzdyń barlyǵy jeńiske jetti.

Atap aıtsaq, búgin sońǵy bolyp rıngke kóterilgen jerlesimiz Mahmud Sabyrhan Italııadaǵy dodanyń 1/8 fınalyna shyqty.

Ol atalǵan týrnırdiń 1/16 fınalynda (57 kg) Taıland boksshysy Saravýt Sýkthetti 3:2 (29:28, 29:28, 29:28, 28:29, 28:29) esebimen jeńdi.

Osylaısha búgin sharshy alańǵa shyqqan tórt boksshymyzdyń tórteýi de jeńiske jetip, kelesi aınalymdarǵa jol aldy.

Búǵan deıin Alýa Balqybekova Chehııanyń jas boksshysy Klaýdıa Totovamen kezdesip, 5:0 esebimen qarsylasyn jarys jolynan shyǵarsa, Natalıa Bogdanova alǵashqy jekpe-jeginde argentınalyq Lorena Soledad Balbýendi jeńdi.

Al erler arasynda 80 kelidegi qazaqstandyq álem chempıony Nurbek Oralbaı 1/16 fınalda Togo memleketiniń sportshysy Preva Padabadıdi 5:0 esebimen jeńiske jetti.

Parıj Olımpıadasynyń joldamasy sarapqa salynyp jatqan týrnır 3 naýryzda bastalǵan bolatyn. Jarys 12 naýryz kúni máresine jetedi. Atalǵan týrnırde erler arasynda 28, áıelder arasynda 21 joldama sarapqa salynýda. Qazaqstan quramasynan erlerden 6, áıelderden 5 boksshy joldamaǵa talasyp jatyr.