Lıtsenzııalyq týrnır: Álisher Erǵalı jartylaı fınalda Qytaıdaǵy qazaq balýanmen beldesedi

BІShKEK. KAZINFORM – Qyrǵyzstan astanasy Bishkek qalasynda kúres túrlerinen ótip jatqan lıtsenzııalyq týrnırde qazaqstandyq balýan Álisher Erǵalı jartylaı fınalda qytaıda turatyn qandasymyz Ábýsaıman Habılamen beldesedi.

97 keli salmaqta el namysyn qorǵap jatqan otandasymyz Álisher Erǵalı shırek fınalda Qyrǵyzstan sportshysy Andreı Aronovty 10:0 esebimen jeńip, jartylaı fınalǵa joldama alǵan bolatyn.

Endi ol Parıj Olımpıadasynyń lıtsenzııasy sarapqa salynatyn asa mańyzdy beldesýin qytaıdaǵy qazaq balýany Ábýsaıman Habılaǵa qarsy ótkizbek.

Qytaıda turatyn qandasymyz 2023 jyly Astanada ótken Azııa chempıonatynda kúmis júldeger atanǵan balýan.

Ábýsaıman Habıla1998 jyly 1 maýsymda qytaıdaǵy Shynjań ólkesinde dúnıege kelgen. 13 jasynan bastap erkin kúres túrimen aınalysa bastaǵan. 

Ol 2021 jyldan beri qaraı Qytaıdyń kúres túrlerinen ulttyq quramasynda 97 keli salmaqta óner kórsetip keledi.

Esterińizge sala keteıik, osyǵan deıin Bishkek qalasynda kúres túrlerinen ótip jatqan lıtsenzııalyq týrnırde erkin kúresten úsh qazaqstandyq balýan jartylaı fınalǵa shyqqanyn jazǵan bolatynbyz. 

Olımpıada oıyndaryna irikteý týrnıriniń fınaldyq beldesýleri 17:00-de bastaldy.

Aıta keteıik, fınalǵa shyqqan eki balýan Parıj Olımpıadasynyń lıtsenzııasyna ıe bolady.