«Lıtsenzııa nómiri kórsetilýi kerek» — medıtsınalyq qyzmet jarnamasyna qandaı talap qoıylady
ASTANA. KAZINFORM — Medıtsınalyq qyzmetti jarnamalaý úshin sol qyzmet túrine memlekettik lıtsenzııa bolýy kerek. Al jarnamada lıtsenzııanyń nómiri men ony bergen organnyń ataýy kórsetilýge tıis. QR Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti Kazinform saýalyna bergen jaýabynda medıtsınalyq qyzmet jarnamasyna qoıylatyn talaptardy túsindirdi.
Komıtet tóraǵasynyń orynbasary Jandos Ádilhannyń málimetinshe, densaýlyq saqtaý salasyndaǵy jarnamaǵa qoıylatyn talaptar «Halyq densaýlyǵy jáne densaýlyq saqtaý júıesi týraly» kodekstiń 56-babynda belgilengen. Sonymen qosa medıtsınalyq qyzmetterdi jarnamalaý tártibi Densaýlyq saqtaý mınıstriniń 2020 jylǵy 21 qyrkúıektegi buıryǵymen bekitilgen arnaıy qaǵıdalarmen retteledi.
Qaǵıdalarǵa sáıkes, medıtsınalyq qyzmetti jarnamalaýdyń negizgi sharttarynyń biri — jarnamalanatyn qyzmet túrine memlekettik lıtsenzııanyń bolýy.
— Mundaı jarnamany buqaralyq aqparat quraldarynda, elektrondyq aqparattyq resýrstarda, densaýlyq saqtaý uıymdarynda, mamandandyrylǵan medıtsınalyq basylymdarda, anyqtamalyq-aqparattyq ortalyqtarda ornalastyrýǵa bolady. Sondaı-aq medıtsınalyq bilimi bar mamandarǵa arnalǵan ǵylymı konferentsııalar, sımpozıýmdar, kórmeler men aktsııalarda medıtsınalyq qyzmetti jarnamalaýǵa ruqsat etiledi, — dedi spıker.
Budan bólek, medıtsınalyq qyzmet jarnamasynda lıtsenzııanyń nómiri jáne ony bergen organnyń ataýy mindetti túrde kórsetilýge tıis. Bul talap medıtsınalyq qyzmet jarnama berýshi arqyly jarnamalanǵan jaǵdaıda da saqtalýy qajet.
— Lıtsenzııasyz medıtsınalyq qyzmetti jarnamalaǵany úshin ákimshilik jaýapkershilik qarastyrylǵan. Ákimshilik quqyq buzýshylyq týraly kodekstiń 428-babynda tıisti lıtsenzııasy joq medıtsınalyq qyzmetterdi jarnamalaǵany úshin jaýapkershilik kózdelgen. Bul talaptyń profılaktıka, dıagnostıka, emdeý jáne medıtsınalyq ońaltý ádisteri men quraldarynyń jarnamasyna da qatysy bar, — dedi Jandos Ádilhan.
Komıtet áleýmettik jelilerde anyqtalǵan jaǵdaılarǵa qatysty qandaı shara qoldanylatynyn da túsindirdi.
— Áleýmettik jelilerde jalǵan jarnama belgileri anyqtalsa, onyń ishinde medıtsınalyq qyzmetti júzege asyrýǵa ruqsat qujattary bolmaǵan jaǵdaıda, aýmaqtyq departamentter ákimshilik is júrgizý rásimin saqtaı otyryp, aıyppul salady. Al jarnama salasyndaǵy zańnamanyń saqtalýyn memlekettik baqylaýdy jarnama salasyndaǵy retteýshi memlekettik organdar júzege asyrady, — dedi spıker.
