Lıssabonda fýnıkýler apatynan qaza tapqandardyń basym bóligi shetel azamattary

ASTANA. KAZINFORM — Portýgalııa astanasy Lıssabonda bolǵan fýnıkýler apatynda qaza tapqandardyń basym bóligi shetel azamattary bolyp shyqty. Bul týraly eldiń polıtsııasy málimdedi, dep habarlaıdy Euronews.

Polıtsııa dereginshe, apat saldarynan kóz jumǵan 16 adamnyń 11-i sheteldikter. Qaza tapqandardyń arasynda bes portýgalııalyq, úsh brıtan azamaty, eki kanadalyq, eki ońtústikkoreıalyq, sondaı-aq amerıkalyq, frantsýz, shveıtsarııalyq jáne ýkraın azamaty bar. Oqıǵa kezinde 21 jolaýshy jaraqat aldy.

Bastapqyda qaza tapqandardyń arasynda nemis azamaty bar dep habarlanǵanymen, keıin ol Lıssabondaǵy aýrýhanalardyń birinen tiri tabyldy. Quqyq qorǵaý organdary bul qateliktiń sebebin túsindirgen joq.

Qaıǵyly oqıǵa 3 qyrkúıek kúni keshke Elevador da Glória fýnıkýleri qozǵalys kezinde relsten shyǵyp ketken sátte oryn alǵan. Ulttyq eskertkish mártebesine ıe sary-aq tústi vagon apat kezinde jergilikti turǵyndar men týrısterge toly bolǵan.

Portýgalııa premer-mınıstri Lýısh Montenegrý bul oqıǵany «eldiń jańa tarıhyndaǵy eń iri qaıǵyly oqıǵalardyń biri» dep atady.

Qazirgi tańda birneshe memlekettik organ tergeý júrgizip jatyr. Memlekettik avıatsııalyq jáne temirjol apattaryn tergeý basqarmasy apat ornyndaǵy saraptamany aıaqtaǵanyn jáne juma kúni aldyn ala tehnıkalyq esepti jarııalaıtynyn habarlady. Al polıtsııanyń aldyn ala esebi 45 kún ishinde daıyn bolady dep kútilýde.

Apattan keıin vagonnyń synyqtary oqıǵa ornynan alynyp, polıtsııanyń baqylaýyna berildi.

Eske sala ketsek, 3 qyrkúıekte Lıssabonda tanymal «Glorııa» fýnıkýleri apatqa ushyrap, keminde 15 adam kóz jumǵan bolatyn. Portýgalııa qaza tapqandarǵa baılanysty aza tutý kúnin jarııalady.