Lıssabon ortalyǵyndaǵy apattan qaza tapqandar sany 17-ge jetti

ASTANA. KAZINFORM — Lıssabonda týrıstik fýnıkýlerde bolǵan apat saldarynan qaza tapqandar sany 17 adamǵa jetti, dep habarlaıdy Anadoly. 

Bul týraly qalanyń azamattyq qorǵaý qyzmetiniń basshysy Margarıda Kastrý Martınsh málimdedi. Onyń aıtýynsha, búgin tańerteń aýrýhanada aýyr jaralanǵan eki adam kóz jumǵan.

Qazirgi tańda taǵy 19 adam em qabyldap jatyr, olardyń jeteýi aýyr jaǵdaıda. Jaralanǵandardyń jasy 24 pen 65 aralyǵynda, erler de, áıelder de bar. Qaza tapqandardyń jeke basy ázirge anyqtalǵan joq.

Aldyn ala derekterge sáıkes, apat arqannyń bosap ketýinen bolǵan. Vagon relsten shyǵyp, burylysta qabyrǵaǵa soǵylyp, aýdarylyp ketken. Fýnıkýlerdiń sońǵy tehnıkalyq qyzmet kórsetilýi 2024 jyly jasalǵan.

Qaıǵyly oqıǵa 3 qyrkúıek kúni jergilikti ýaqytpen 18:08-de Lıssabon ortalyǵyndaǵy áıgili «Glorııa lıftinde» (Elevador da Glória) bolǵan.

Portýgalııa úkimeti bir kúndik ulttyq aza tutý kúnin jarııalady, al Lıssabon merııasy úsh kúndik qaraly kún belgiledi. Portýgalııa halqyna Túrkııany qosa alǵanda, kóptegen el qaıǵyǵa ortaqtasyp, kóńil aıtty.

1885 jyly ashylǵan «Glorııa» fýnıkýleri Lıssabonnyń tarıhı nysandarynyń biri sanalady. Ol eki vagonnan turady, árqaısysyna 42 jolaýshy sııady. 275 metr joldy eki mınýtta júrip ótedi. Jyl saıyn shamamen úsh mıllıon adam osy fýnıkýlerdi paıdalanady. 

Aıta ketelik Memleket basshysy Portýgalııa Prezıdentine kóńil aıtý jedelhatyn joldady. 

Eske sala keteıik, Portýgalııa bıligi kóptegen adam qaza taýyp, jaraqat alǵan «Glorııa» fýnıkýlerindegi apatqa baılanysty ulttyq aza tutý jarııalaǵan bolatyn.

3 qyrkúıekte Lıssabondaǵy týrıster arasynda tanymal «Glorııa» fýnıkýleri relsten shyǵyp ketken edi. Apattan 15 adam mert bolyp, 18 adam jaraqat aldy, sonyń ishinde beseýiniń jaǵdaıy aýyr ekeni habarlanǵan bolatyn.