Lısakovta zamanaýı balalar tehnoparki ashylmaq
Lısakovta qurylysy bastalatyn tehnopark tsıfrly tehnologııalarmen qamtamasyz etiletin óńirdegi tuńǵysh nysan bolmaq. Bul týraly oblystyq bilim basqarmasynyń keńeıtilgen alqa májilisinde Lısakov qalasynyń ákimi Almat Ysmaǵulov aıtty.
«Tehnopark robototehnıka salasyna negizdeletin bolady. Sondaı-aq, mektepke deıingi uıym LEGO-qurastyrmalarmen jaraqtandyrylady. Osy maqsatta ınteraktıvti qurylǵylar men noýtbýkter, 3D-prınterler men robototehnıka jabdyqtaryn satyp alý úshin bıýdjetten 8 mln 700 myń teńge qarastyryldy. Zamanaýı kommýnıkatsııanyń ońtaıly arnalary tańdaldy. Bir sózben aıtqanda tehnopark robototehnıkanyń bazalyq keshenine aınalady», - dedi qala ákimi.
Almat Ysmaǵulovtyń sózinshe, qalada iske asyrylyp jatqan tsıfrlandyrý jobalary qosymsha bilim berý salasyn aınalyp ótpeıdi.
«Tsıfrlandyrý bilim berý protsesindegi mańyzdy ári tyń qadam ekeni sózsiz. Sonyń dáleli retinde Lısakov qalasyndaǵy mekteparalyq oqý-óndiristik ortalyǵynda qolǵa alynǵan «Bolashaqtyń ınjenerleri» baǵdarlamalyq júıesin aıtýǵa bolady. Bul baǵdarlama búginde Lısakov tehnıkalyq kolledjinde sátti jalǵasyn tapty. Mundaǵy kabınetterdiń kóbi tsıfrlyq tehnologııalarmen jabdyqtalǵan», - dedi A.Ysmaǵulov.
Bilim berý salasyn tsıfrlandyrý boıynsha qalada iske asatyn jobalardyń biri - zamanaýı STEM -laboratorııa. Munda robototehnıkanyń oqý baǵdarlamalary, 3D-modeldeý, túrli baǵdarlamalar jasaý kózdelip otyr. Joba memlekettik-jemenshik áriptestik aıasynda qolǵa alynady.