Lısakovta meıramhana órtendi
QOSTANAI. QazAqparat - Qostanaı oblysynyń Lısakov qalasynda búgin túnde «Orda» meıramhanasy órtendi, dep habarlaıdy QazAqparat.
Órt shamamen túngi birde bolǵan. Lısakovtyq órt sóndirýshiler 01:15-te meıramhananyń órtengeni týraly habarlama alǵan. Bul ýaqytta «Orda» meıramhanasy jabylǵandyqtan japa shekken adamdar bolmady. Al qala turǵyny Stas Gavrılıýktiń aıtýynsha, órt jarty saǵat shamasynda sóndirildi.
«Úıge endi kele jatqanmyn. «Ordanyń» órtenip jatqanyn kórdim. Meıramhana janynda órt sóndirýshiler júrdi», - deıdi kýáger.
Lısakov qalasy TJ bóliminiń málimetine súıensek, órtengen jerdiń aýmaǵy - 35 sharshy metr.
«Ǵımarattyń jazǵy dámhanasy órtengen. Ázirge órttiń neden shyqqany belgisiz. Biz tıisti oryndarǵa habar berdik», - dedi Lısakov qalasy TJ bóliminiń bas mamany Aısulý Toıǵanova.
