Lısakovta eskertkishterdi qıratyp, qorshaýdy buzatyn qaskóı paıda boldy
QOSTANAI. QazAqparat - Lısakov qalasynda eskertkishterdi qıratyp, qorshaý temirlerdi maıystyryp júrgen buzaqylar paıda boldy, dep habarlaıdy QazAqparat.
Lısakov qalalyq máslıhatynyń kezekti VIII sessııasynda depýtattar tarapynan osy másele kóterildi. Depýtattar jergilikti polıtsııa qyzmetiniń jumysyn qanaǵattanarlyq dep baǵalap, zań buzýshy vandaldardy izdep tabýyn talap etti. Sebebi, bul jaǵdaı ekinshi ret qaıtalanyp otyr. Onyń aldynda buzaqylar temir oryndyqtardy maıystyryp, aǵashtardy syndyryp ketken.
Lısakov qalasy jergilikti polıtsııa qyzmetiniń bastyǵy Rústem Boldýsovtyń aıtýynsha, qylmystyq quqyq buzýshylyqtyń aldyn alý sharalary boıynsha qalada jyl basynan beri 2133 ákimshilik quqyq buzýshylyq tirkelgen. Quqyq tártibi týraly qoǵamnyń oı-pikirin zertteý, halyqtyń senimdilik deńgeıin arttyrý úshin «Facebook» jáne «VKontakte» áleýmettik jelilerinde Jergilikti polıtsııanyń resmı betteri ornalastyryldy. Endi turǵyndar áleýmettik jeliler arqyly oı-pikirlerin jetkize alady.
Profılaktıkalyq is-sharalardyń nátıjesinde basqa bireýdiń múlkin urlaýdy 240 qylmystan 152-ge deıin tómendetýge qol jetkizilse de, kóshe tazalyǵyna zııan keltirip júrgen buzaqylardy ustaý qıyn sharýa bolyp otyr. Oǵan bir sebep - saıabaqtar men demalys oryndaryndaǵy beınekameralardyń azdyǵy.
5 qyrkúıek kúni turǵyndar ortalyq saıabaqtaǵy eskertkishter men tas músinderdiń qıraǵanyn baıqaıdy. «Baqytty elik» dep atap ketken músinniń qulap jatqan sýretin ǵalamtorǵa taratqan. Olar «tas eliktiń» aıaǵyn balǵamen urǵylap, úgitken.
Qala turǵyny Samal Jantóreqyzynyń aıtýynsha, ortalyq saıabaqta 2015 jyldan bastap polıtsııa beketi joq. Tek qana «Jasyl alqapqa qol tıgizbeńizder!» dep jazylǵan aqparattyq belgi bar.
