Lısakovskide polıtsııadan qashpaq bolǵan júrgizýshi qaza tapty

QOSTANAI. KAZINFORM — Lısakovskide júrgizýshiniń polıtsııadan qashyp qutylýǵa tyrysqan áreketi qaıǵyly jaǵdaımen aıaqtaldy. Qaýipti manevrler jasaǵan júrgizýshi jaryq baǵanasyna soǵylǵannan keıin qaza tapty, dep habarlaıdy Kazinform.

1 jeltoqsanda Lısakovsk qalasynda patrýldik polıtsııa qyzmetkerleri jolda qaýipti manevr jasaǵan jáne jaıaý júrginshi ótkelinde jaıaý júrginshige jol bermegen VAZ-21093 avtokóligine nazar aýdarǵan.

Tártip saqshylarynyń zańdy toqtatý talabyna er adam esh mán bermesten qozǵalysyn jalǵastyrǵan. Sondaı-aq atalǵan avtokóliktiń memlekettik tirkeý nómirinsiz júrgeni anyqtaldy.

Aınalma jolaıryǵy tusynda júrgizýshi qarsy qozǵalys jolaǵyna shyǵyp, jaryq júıesiniń beton baǵanasyna soǵylǵan. Alǵan jaraqattarynan er adam oqıǵa ornynda kóz jumdy. Al kólik jolaýshysy jaraqat alyp, aýrýhanaǵa jetkizildi.

Aldyn ala derekter boıynsha, qaza tapqan adam buǵan deıin kólikti mas kúıinde basqarǵany úshin jaýapkershilikke tartylǵan eken. Oqıǵaǵa qatysty sotqa deıingi tergeý bastaldy, jaǵdaıdyń barlyq mán-jaıy anyqtalyp jatyr.

Polıtsııa mas kúıinde kólik basqarý jáne Jol qozǵalysy erejelerin óreskel buzý júrgizýshiniń ózine ǵana emes, jol qozǵalysynyń basqa qatysýshylarynyń da ómiri men densaýlyǵyna tikeleı qaýip tóndiretinin eske salady.

Eske sala ketsek, Almatyda bir túnde 6 mas júrgizýshi ustaldy.

Al keshe elordada jol apaty saldarynan jaıaý júrginshi aıaǵynan aıyryldy.