Lısakov qalasynda táýelsizdik alǵaly birinshi ret turǵyn úı salynyp jatyr
QOSTANAI. QazAqparat - Arhımed Muhambetov Lısakov qalasyna baryp, birqatar áleýmettik nysandy aralady, dep habarlaıdy QazAqparat.
Oblys basshysy aldymen Lısakov qalasyndaǵy 7-shaǵynaýdanda salynyp jatqan kópqabatty turǵyn úı qurylysymen tanysty. Aıta keteıik, bul nysan - táýelsizdik jyldarynan beri salyna bastaǵan alǵashqy qurylys. Onyń qurylysy bıyl mamyr aıynda bastaldy. 60 páterli turǵyn úı jospar boıynsha 2020 jyly aıaqtalýy tıis. Degenmen, merdiger uıym qarjy jetkilikti bolsa, úıdi merziminen buryn tapsyramyz dep otyr.
«Osy jylǵa bólingen 35 mln teńge qarjyny tolyqtaı ıgerdik. Qurylys jumystaryn toqtatpaý úshin óz qarjymyzǵa kerekti jabdyqtardy satyp alyp jatyrmyz. Úıdiń sapasy jaqsy. Іrgetasyn 3 metr tereńdikke ornattyq. Tasty ustap turatyn sapaly topyraq tósedik. Aldaǵy ýaqytta qarjy bólinse deımiz. Qysqa deıin 17 mln teńge qajet. Jospar boıynsha qarasha-jeltoqsan aıynda árleý jumystary bastalyp ketýi tıis», - dedi «Rýdnyısokolovstroı» JShS qurylys bóliminiń meńgerýshisi Vladımır Kravchenko.
Turǵyn úıdi rýdnyılyq fırma salyp jatqanymen, jumyskerler Lısakov qalasynan tartylǵan. Ústeme qarjy jaǵy sheshilse, olar eki aýysymmen jumys isteýge ázir. Óz kezeginde Arhımed Muhambetov aqsha máselesin birjaqty etýge ýáde etti. Sondaı-aq, ol páter kezeginde daý-damaıdyń bolmaýyn qadaǵalaýdy tapsyrdy. 
«Baspana kezekte turǵan muqtaj jandarǵa beriledi. Páterdi bólgen kezde memlekettik organdar kirispesin. Sony qadaǵalańyzdar! Baspanaǵa muqtaj jandardyń tizimin jasaýmen qoǵam belsendileri men depýtattar aınalyssyn», - dep tapsyrdy ákim.
A.Muhambetov bıyl kúrdeli jóndeýden ótken qaladaǵy №4 orta mektepke soqty. Jóndeý jumystaryna 470 mln teńge qarjy jumsalǵan. Jalpy, bilim mekemesi ǵımaraty 1974 jyly paıdalanýǵa berilgen. Mektep dırektory Evgenııa Ezeheldiń sózinshe, kadr tapshylyǵy joq. Munda zamanǵa saı STEM laboratorııasy jumys istep tur. Oqýshylar robot tehnıkasy sabaǵyna qatysady.
Óńir basshysy qaladaǵy ortalyq stadıonǵa da bardy. Atalǵan sporttyq nysanǵa jýyrda ǵana kúrdeli jóndeý jumystary jasalǵan. Fýtbol alańy tóselip, kórermender trıbýnasy jańardy. Sportshylardyń kıim aýystyrý, jattyǵý bólmeleri de jańa keıipke engen. Tamyz aıynda bul stadıonda oblystyq «Tyń-Tselına» spartakıadasy ótken bolatyn. Jóndeý jumystary men sporttyq sharany ótkizýge bas-aıaǵy 700 mln teńge jumsaldy.
