Lısakov qalasynda áktas óńdeý zaýyty ashylady
QOSTANAI. QazAqparat – Lısakov qalasynda eki iri ınvestıtsııalyq joba júzege aspaq. Bul týraly ortalyq kommýnıkatsııalar brıfınginde ótken baspasóz máslıhatynda Lısakov qalasynyń ákimi Almat Ismaǵulov aıtty, dep habarlaıdy QazAqparat.
Lısakov qalasynda ótken toǵyz aıda ónerkásiptik óndiris salasy ilgerilep, 46 mlrd teńgeniń ónimi óndirilgen. Ósim óńdeýshi ónerkásipte de baıqalady. Mundaǵy kórsetkish 6,1 mlrd teńgege jetip, ótken jylǵa qaraǵanda 29%-ǵa ósken.
«Óńirimizde áktasty óńdeý zaýyty qolǵa alynady. Jobaǵa shamamen 3 mlrd teńge ınvestıtsııa tartyldy. 50 jańa jumys oryny ashylýy tıis. Bul zaýytty ónerkásip óniminiń qurylymyn ártaraptandyrý maqsatynda «Shaımerden» AQ qarjylandyrady. Taǵy bir jobany «Bobrovskıı Kvartsıt» JShS bastady. Atalmysh seriktestik 9 mlrd teńgege jýyq ınvestıtsııa salyp, karbıd kremnıı óndirisi zaýytyn ashady. Qýattylyǵy – jylyna 34 myń tonna. Munda barlyǵy 132 jumys oryn paıda bolady. Jalpy negizgi kapıtalǵa salynǵan ınvestıtsııalardyń kólemi 21 mlrd teńgeni qurady, bul 2018 jylǵa qaraǵanda 31%-ǵa artyq», - deıdi Almat Ismaǵulov.
Qala ákimi turǵyn úı qurylysy men ınjenerlik jelilerdi jańǵyrtý jumystaryna da toqtaldy. Bıyl Lısakov qalasynda 9 myńǵa jýyq páter paıdalanýǵa berildi. Bul ótken jylmen salystyrǵanda toǵyz ese kóp. «Nurly jer» baǵdarlamasy boıynsha 60 páterli jaldamaly turǵyn úı eldiń ıgiligine berildi. Memlekettik-jekemenshik áriptestik mehanızmi aıasynda burynǵy jataqhana jóndelýde. Keıin kezekte turǵan muqtaj jandarǵa arendalyq baspana boıynsha berilmek. Qazir kenshiler qalasynda turǵyn úıge degen suranys az emes. 695 otbasy kezekte tur.
Monoqalada sporttyq oıyn-saýyq kesheniniń qurylysy júrip jatyr. Jergilikti mádenıet úıinde jeke ınvestor 97 orynǵa shaqtalǵan kınoteatr ashpaq. Injenerlik jelilerdi jóndeý boıynsha toǵyz joba ázirlendi. Onyń altaýy iske asyrylýda. Keler jyly sý qubyrlaryn jańartý jumystary bastalady. Odan bólek, bıyl sý jáne jylý jabdyqtaryn kúrdeli jóndeýden ótkizýge qajetti qarajat bólindi.
