Lısakovta temir rýdasy qaldyǵyn qaıta óńdeıtin ónerkásiptik keshen salynady
QARAǴANDY. KAZINFORM – Qazaqstan «jasyl ekonomıka» men ekologııalyq turaqtylyqqa baǵyttalǵan ındýstrııalyq jańǵyrý jolyn jalǵastyrýda. Lısakov qalasynda iske qosylatyn jańa joba – ken óndirý qaldyqtaryn qaıta óńdep, ónerkásiptiń ekologııalyq jáne tehnologııalyq áleýetin arttyrýǵa baǵyttalǵan mańyzdy bastama.
Qarmet Recycling jáne FST Engineering Co. kompanııalary Lısakov qalasynda temir rýdasy qaldyqtaryn qaıta óńdeýge arnalǵan birlesken jobany júzege asyrý týraly aldyn ala kelisimge qol qoıdy. Jańa óndiris orny óńirdegi mıneraldyq resýrstardy ekinshi aınalymǵa engizý baǵytyndaǵy eń iri ónerkásiptik keshenderdiń biri bolmaq.
Basty maqsat — ekologııalyq turǵydan qaýipsiz ári zamanaýı óndiris qurý. Bul bastama baǵaly shıkizatty qaıta aınalymǵa engizip, tabıǵı resýrstarǵa túsetin salmaqty azaıtýǵa múmkindik beredi. Joba halyqaralyq standarttar men ınnovatsııalyq ınjenerlik sheshimderdi qoldana otyryp júzege asyrylady.
Alǵashqy kezeńde jyl saıyn shamamen eki mıllıon tonna qaıtalama shıkizat óńdelip, nátıjesinde bir mıllıon tonnadan astam temir rýdasy kontsentraty alynbaq. Bul kontsentrat keıin metallýrgııa óndirisine jóneltilip, saladaǵy shıkizat tapshylyǵyn azaıtýǵa sep bolady.
1994 jyly qurylǵan FST Engineering Co. – ınjenerlik jobalaý jáne ónerkásiptik keshender salasynda bedeldi halyqaralyq kompanııa. Ol ken óndirýden bastap bolat óndirýge deıingi tolyq tsıkldi tehnologııalyq sheshimderdi usynady. Halyqaralyq seriktestiń tájirıbesi men ınnovatsııalyq tásilderi qazaqstandyq óndiris talaptaryna beıimdelmek.
«Joba eki negizgi baǵyt boıynsha júzege asyrylady. Birinshi baǵyt – ónimdi keıingi defosforızatsııamen óńdeý, oǵan keshendi zertteý júrgizý jáne alynǵan kontsentrattyń joǵary sapasyn qamtamasyz etetin ońtaıly tehnologııalyq shemany tańdaý kiredi. Ekinshi baǵyt – temir rýdalaryn óńdeý jáne defosforızatsııa protsesteri. Qazirgi kezeńde zerthanalyq zertteý úshin shıkizat úlgilerin jiberý josparlanyp otyr, olardyń nátıjesi ónerkásiptik óńdeý tehnologııasyn qalyptastyrýdyń negizi bolady», – dedi Qarmet kompanııasynyń qaıta óńdeý jónindegi dırektory Sergeı Malyhın.
Ótken jyly Qarmet kompanııasy qaıta óńdeý salasyna arnalǵan halyqaralyq «Qarmet Recycling» forýmyn ótkizgen bolatyn. Qazirgi tańda kompanııanyń qaramaǵynda tarıhı turǵyda jınaqtalǵan 750 mıllıon tonnadan astam qaıtalama shıkizat bar. Olardyń qatarynda bolat balqytý jáne domna shlaktary, kómir baıytý ónimderi, taý jynystary men ózge de qaldyqtar bar. Bul resýrstar búginde ónerkásiptiń túrli salalarynda keńinen qoldanylýda.
Qarmet qaıtalama shıkizatty qaıta óńdeýdi ekonomıkalyq turǵydan tıimdi sheshim retinde ǵana emes, sonymen qatar ornyqty damýdyń negizgi quramdas bóligi dep qarastyrady. Mundaı jobalar óndiristik qaldyqtardy azaıtyp, kómirtek izin tómendetýge jáne baǵaly komponentterdi qaıta óndiris aınalymyna engizýge jol ashady. Osylaısha kompanııa tuıyq tsıkldi, resýrstardy tolyq paıdalanýǵa negizdelgen ekonomıkalyq model qalyptastyrýda.
Bul bastama tabıǵı resýrstardy utymdy paıdalanýǵa, ekologııalyq júktemeni azaıtýǵa jáne kompanııanyń ESG-transformatsııa salasyndaǵy ustanymyn nyǵaıtýǵa múmkindik beredi. Sonymen birge jańa tehnologııalardy engizý arqyly jańa jumys oryndary ashylyp, ǵylymı-tehnıkalyq yntymaqtastyq artyp, Qazaqstannyń metallýrgııa salasyndaǵy eksporttyq áleýeti keńeıe túspek.
Qarmet aldaǵy ýaqytta da ekologııalyq ınnovatsııalardy damytýǵa basymdyq berip, resýrstardy tıimdi paıdalaný jáne ónerkásiptik qýatty arttyrý arqyly el ekonomıkasynyń turaqty ósýine óz úlesin qosýdy kózdep otyr.