Lıonel Messıge argentınalyq esirtki karteli qoqan-loqy kórsetti

ASTANA. QazAqparat – «Parı Sen-Jermen» fýtbol klýbynyń shabýylshysy Lıonel Messıdiń Argentınadaǵy týǵan qalasynda turatyn týystaryna tıesili sýpermarketke belgisiz adamdar shabýyl jasap, fýtbolshyǵa qoqan-loqy kórsetilgen qaǵaz tastap ketken, dep habarlaıdy QazAqparat ESPN silteme jasap.

Beısenbi kúni tańerteń mototsıkldegi eki adam Messı týyp ósken Rosarıo qalasyndaǵy azyq-túlik dúkeniniń terezesi men esigine on tórt ret oq atqan.
Fýtbolshynyń jubaıynyń otbasyna tıesili dúkenge jasalǵan shabýyldan eshkim zardap shekken joq.
Polıtsııa shabýyldaǵan adamdar karton qaǵazǵa qoqan-loqy kórsetip jazba qaldyrǵanyn habarlady. Onda bylaı delingen: «Messı, biz seni kútemiz. ıAvkın – esirtki satýshy. Onyń saǵan qamqor bolatyn oıy joq».
Tergeý júrip jatyr. Pablo ıAvkın – Býenos-Aıresten soltústikke qaraı 300 shaqyrym jerdegi Santa-Fe ortalyq provıntsııasyndaǵy iri qalanyń biri Rosarıo meri.
Osy oqıǵadan keıin beısenbi kúni ıAvkın jýrnalısterge Rosarıoda zorlyq-zombylyqtyń artqanyn, polıtsııa jetispeıtinin jáne qalada qorǵanys joq ekenin aıtty.
2022 jylǵy Álem chempıonatynda Argentına quramasynyń kapıtany atanǵannan keıin dúısenbi kúni FIFA-nyń úzdik oıynshysy dep tanylǵan Messı de, Rosarıoda týyp-ósken onyń jubaıy da bul oqıǵaǵa qatysty pikir bildirgen joq.
Uly fýtbolshy dep moıyndalǵan Messı qazirgi ýaqytta «Parı Sen-Jermen» klýbynda oınaıdy jáne ýaqytynyń kóp bóligin shetelde ótkizedi. Degenmen týǵan qalasy Rosarıoǵa da jıi baryp turady, onda qala syrtynda úıi bar.
Argentınanyń qaýipsizdik mınıstri Anıbal Fernandes dúkenge shabýyldy esirtki kartelderiniń biri qorqytý úshin jasaǵan deıdi.
35 jastaǵy Messı qazirgi ýaqytta bıyl merzimi aıaqtalatyn «PSJ» klýbymen kelisimshartty qaıta qarap jatyr. Fýtbol sýperjuldyzy mansabyn aıaqtap, Rosarıodaǵy jergilikti klýbtardyń birinde oınaýy múmkin degen qaýeset bar.