Lıonel Messı jyldyń úzdik shabýylshysy atandy
ASTANA. 29 jeltoqsan. QazAqparat - Ispandyq «Barselona» fýtbol klýbynyń jáne Argentına ulttyq quramasynyń forvardy Lıonel Messı 2012 jyldyń úzdik shabýylshysy atandy, dep habarlady RosBıznesKonsaltıng.
Bul tizimdi qurastyrǵan Halyqaralyq fýtbol tarıhy jáne statıstıkasy federatsııasy (IFFHS), ekinshi oryndy «Realdyń» forvatory Krıshtıný Ronaldýǵa berdi. «Atletıko» shabýylshysy Radamel Falkao úshinshi orynǵa shyqty.
Bul úshtik fýtboldaǵy eń bedeldi jeke nagrada - «Altyn dop» úshin talasady. Negizgi kúres Messı men Ronaldý arasynda ótedi degen boljam aıtylýda. Sońǵysy ótken jylǵy marapat tapsyrý saltanatynda uıymdastyrýshylarǵa, eger kelesi jyly «Altyn dop» almasa, mundaı sharalarǵa qatyspaıtynyn aıtyp ses kórsetken.
Eske sala keteıik, qurama deńgeıinde de Messı 2012 jylǵy úzdik shabýylshy ataǵyna ıe boldy. «Altyn doptyń» úsh márte ıegeri 12 gol avtory boldy. Ekinshi orynda - Shvetsııa quramasynda oınap 11 dop soqqan Zlatan Ibragımovıch.
Degenmen Messı jyl qorytyndysy boıynsha Argentınanyń úzdik sportshysyna tapsyrylatyn «Olımpııa-de-Oro» marapatyna qol jetkize almady. Ótip bara jatqan jyldaǵy Argentınanyń úzdik sportshysy ataǵyna boksshy Serhıo Martınes ıe boldy, ekinshi orynǵa taekvondo ókili Londondaǵy Olımpıada oıyndarynda 80 kelige deıingi salmaqta chempıon atanǵan Sebastıan Krısmanıch shyqty. Al Lıonel Messı úshinshi oryndy qanaǵat tutty.
