Lıonel Messı sport karerasynda myńynshy márte jasyl alańǵa shyqty

ORAL. QazAqparat – Qatarda fýtboldan ótip jatqan álem chempıonatynda Argentına shabýylshysy Lıonel Messı óz sporttyq jolynda Aýstralııamen matchta myńynshy ret jasyl alańǵa shyqty, dep habarlaıdy QazAqparat tilshisi.

Argentına kapıtany sporttyq mansabynyń basym bóligin Ispanııanyń «Barselona» klýbynda ótkizdi.

Ataqty komanda quramynda Messı 778 kezdesýde dop tepti. Lıonel qazirgi klýby Frantsııanyń «PSJ» komandasynda 53 oıynda alańǵa shyqty.

Sonymen qatar L.Messı ulttyq quramanyń jeıdesin 169 ret kıdi.

Lıonel Messı – «Altyn doptyń»» jeti dúrkin ıegeri. Ol «Barselonamen» birge 10 ret Ispanııa birinshiliginiń, tórt dúrkin Chempıondar lıgasynyń jeńimpazy atandy.

Úsh ret ÝEFA sýperkýbogine qol jetkizdi. Al «PSJ» quramynda ótken maýsymda Frantsııada úzdik shyqty.

L.Messı 2008 jyly Beıjiń olımpıadasynyń jeńimpazy bolsa, 2014 jyly Argentına quramasymen birge álem chempıonatynyń kúmis júldegeri atandy.

Bıylǵy birinshilik 35 jastaǵy L.Messıdiń sońǵy chempıonaty bolýy ábden múmkin. Sondyqtan ol komandasymen birge barynsha tabysty óner kórsetýdi kózdeıdi.

Eske sala keteıik, álem chempıonatynda Serbııany utqan Shveıtsarııa pleı-off kezeńine shyqty.

Brazılııanyń eki fýtbolshysy álem chempıonatynyń qalǵan oıyndaryna qatysa almaıdy.