Lıonel Messı resmı túrde «Parı Sen-Jermenniń» oıynshysy atandy
PARIJ. QazAqparat - «Altyn doptyń» alty dúrkin ıegeri, argentınalyq Lıonel Messı «Parı Sen-Jermen» frantsýz klýbymen kelisimshartqa qol qoıdy, dep habarlaıdy QazAqparat BBC-ge silteme jasap.
Kelisimshart «2+1» shemasymen jasalǵan, ony 2024 jyldyń maýsymyna deıin sozýǵa múmkindik bar. Messı 30-shy nómirmen oınap, bir maýsymda 35 mln eýro alady.
«Mansabymnyń Parıjde jalǵasýyn asyǵa kútip júrmin. Klýb pen onyń maqsaty meniń ambıtsııama tolyq sáıkes keledi. Munda daryndy oıynshylar men qyzmetkerler jumys isteıtinin bilemin. Klýb pen jankúıerlerge erekshe áser syılaǵym keledi», - dedi Messı kelisimshartqa qol qoıǵannan keıin.
Seısenbi kúni Lıonel Messı jubaıymen jáne balalarymen Barselonadan Parıjge kelip, kelisimshartqa qol qoımas buryn medıtsınalyq tekserýden ótti.
«PSJ» jańa oıynshyny sársenbi kúni ótetin baspasóz máslıhatynda resmı tanystyrady.
Óz mansabynda tek «Barselonada» oınaǵan Messı kelisimshartty uzartý týraly kelisimge kele almaǵandyqtan katalondyq klýbtan ketýge májbúr bolǵan edi. Kóp uzamaı onyń jańa klýbqa qatysty óz tańdaýyn jasaǵany týraly aqparat taratyldy.
34 jastaǵy fýtbolshy «Barsamen» 36 týrnırde jeńiske jetip, 672 gol soqty. Messı ótken jyly jazda «Barselonadan» ketpekshi boldy, biraq klýb ony jibergen joq. Osy jyldyń 1 shildesinde ol bos agent atandy. Senbi kúni Messı klýbpen kózine jas alyp qoshtasyp, jankúıerleri men klýbtaǵy áriptesterine alǵys aıtty.
Messıdiń ózi jalaqysyn eki ese azaıtýǵa daıyn ekenin aıtyp, «Barsada» qalý úshin baryn saldy. Biraq, La Lıganyń qatań erejesi men 1 mlrd eýrodan asatyn «Barselonanyń» qaryzyna baılanysty jańa kelisimshart jasaýǵa múmkindik bolmady.
Sondyqtan, «Barsa» onyń jalaqysyn tómendetse de Messımen kelisimdi uzarta almaıtyn edi. ÝEFA-nyń qarjy erejesine (fýtbol klýbtary tapqan paıdasynan kóbirek aqşa jumsamas úshin jasalǵan) sáıkes, klýbtar óz aınalymynyń 70% astamyn jalaqyǵa jumsaıtyn bolsa, jańa oıynshy tirkeı almaıdy.
Messıdiń usynǵan jańa kelisimindegi bul soma 100% asatyn boldy.
«Men munda 13 jastan bastap turyp kelemin. 21 jyldan keıin ketip baramyn. Jubaıymmen jáne úsh balammen birge. Qaıta oralmaımyz dep ýáde bere almaımyn. Sebebi, bul – meniń úıim», - dedi fýtbolshy qoshtasyp jatyp.
