Lıonel Messı: Men úshin úzdik oıynshy tıtýlynyń esh mańyzy joq
ASTANA. QazAqparat - Argentına quramasynyń kapıtany Lıonel Messı 2014 jylǵy álem chempıonatynyń úzdik oıynshysy ataǵyna mán bermeıtinin aıtty. Eske sala keteıik, báske fýtboldan álem birinshiliginiń bas júldesi qoıylǵan nemister men argentınalyqtar arasyndaǵy oıyn 1:0 esebimen Germanııa quramasynyń paıdasyna sheshildi.
"Eger seniń quramań bul synda jeńiske jetpese, álem chempıonatynyń úzdik oıynshysy degen ataqtyń esh mańyzy bolmaıdy. Armanym - bul chempıonatta jeńiske jetý edi. Qaqpanyń kiltin tabý múmkindikteri boldy bizde, alaıda ony durys paıdalana almadyq. Sol úshin ózimizdi jazǵyryp otyrmyz", - dedi Messı.
