Lıonel Messı men Krıshtıaný Ronaldý aralasa ma
ASTANA. QazAqparat - «Barselonanyń» shabýylshysy Lıonel Messı madrıdtik «Realdyń» forvardy Krıshtıaný Ronaldýmen qalaı jáne qaı jerde aralasatynyn aıtyp berdi, dep habarlaıdy QazAqparat tilshisi Marca.com saıtyna silteme jasap.
«Endi, ekeýimizdiń aramyzda dostyq bola ma, joq pa, ol jaǵyn bilmeımin. Ol úshin eki adam tyǵyz aralasýy qajet, bir-birin tanýy kerek. Sonda ǵana dostyq bastalady. Ronaldý ekeýimizdiń aramyzda ondaı qarym-qatynas joq. Biz, kóp jaǵdaıda, marapattardy tapsyrý sııaqty saltanatty sharalarda ǵana kezdesemiz, aralasyp turamyz. Sondaı jerlerde bári oıdaǵydaı bolady. Al endi qalǵan ýaqytta jolymyz túıispeıdi», - deıdi Messı.
Aıta keteıik, 2008 jyldan beri Messı men Ronaldý kezek-kezek «Altyn doptyń» ıegeri atanyp keledi. Atalǵan marapat jyldyń qorytyndysy boıynsha úzdik oıynshyǵa tabystalady. 30 jastaǵy argentınalyqtyń úlesinde bes «Altyn dop» bar. Al 32 jastaǵy portýgaldyq fýtbolshy atalǵan syılyqty tórt ret alǵan. Jaqynda Lıonel Messı «Altyn býtsanyń» ıegeri atandy.
