Lıonel Messı medıtsınalyq tekserýden ótý úshin Parıjge keldi
PARIJ. QazAqparat - Seısenbi kúni Parıjge kelgen argentınalyq shabýylshy Lıonel Messı Býrje áýejaıynan Frantsııa astanasynyń batys shetinde, Noılı-sıýr-Sen qalasynda ornalasqan amerıkandyq aýrýhanaǵa bet aldy. Onda fýtbolshy medıtsınalyq tekserýden ótedi, dep habarlaıdy QazAqparat BFM telearnasyna silteme jasap.
Aldymen Messı otbasymen tek jeke jáne jalǵa alynǵan ushaqtar qabyldanatyn Býrje áýejaıynda boldy. Ol birneshe ret ashyq tereze arqyly óziniń talantyna bas ıgen jankúıerlermen sálemdesti.
Aıta ketken jón, Barselonamen birge Messı on ret Ispanııa chempıony atandy. Jeti ret - Ispanııa kýbogynyń, segiz ret - eldiń Sýperkýbogynyń jeńimpazy boldy. Ol tórt ret Chempıondar lıgasyn, úsh ret ÝEFA Sýperkýbogyn jáne úsh ret klýbtar arasyndaǵy álem chempıonatyn jeńip aldy. Álemdegi jyldyń úzdik oıynshysyna beriletin «altyn dopty» Messı alty ret enshiledi. Bul - rekord.
Argentına quramasynda Messı 151 match ótkizip, onda 76 gol soqty. Ulttyq quramanyń quramynda ol Amerıka kýbogyn (2021) jeńip aldy. 2014 jylǵy álem chempıonatynda Messı Argentına quramasymen birge fınalǵa shyqty.
