Lıonel Messı – fýtbol tarıhynda eń kóp júlde alǵan oıynshy
NEShVILL. QazAqparat – MLS + MX Lıgasy kýboginiń fınaldyq matchy aıaqtaldy. Fınalda «Neshvıll» komandasy «Inter Maıamı» ujymymen kezdesti, dep habarlaıdy QazAqparat Championat.com saıtyna silteme jasap.
Komandalar Neshvıldegi (AQSh) «Geodıs Park» stadıonynda oınady. Matchtyń negizgi ýaqyty teń eseppen aıaqtaldy – 1-1. Matchtan keıingi penaltı serııasynda «Inter Maıamı» fýtbolshylary myqtylyq tanytty.
Búgingi matchtaǵy jeńisiniń arqasynda «Inter Maıamı» MLS + MX Lıgasynyń kýbogine qol jetkizdi. Bul – Lıonel Messıdiń jańa klýb quramyndaǵy alǵashqy jetistigi. Osylaısha, argentınalyq fýtbolshy kásibı mansabyndaǵy 44-shi ataǵyn ıelenip, fýtbol tarıhyndaǵy eń tıtýly kóp oıynshy atandy.
Búgingi oıynǵa keler bolsaq, Messı birinshi taımda gol soqty, sondaı-aq penaltı serııasynda da qaqpaǵa dop kirgizip, myqtylyǵyn dáleldedi.
Búginge deıin Messı qorjynynda 43 tıtýl bar edi. Mansabyn aıaqtaǵan brazılııalyq qorǵaýshy Danı Alves ta osynsha tıtýl oljalaǵan. Endi argentınalyq oıynshy 44-shi ataǵyna qol jetkizip, kósh basyna shyqty.
