Lıonel Messı Argentına quramasy sapynda sońǵy oıynyn ótkizdi
ASTANA. KAZINFORM - Álem fýtbolynyń ańyzy Lıonel Messı Argentına quramasy sapynda Benınmen joldastyq kezdesýde qoshtasý matchyn ótkizdi.
Bul kezdesý búgin, 7 qazanda ótti. Kezdesý barysynda argentınalyq fýtbolshy negizgi quramda jasyl alańǵa shyqty. Toqsan mınýt boıy oıynǵa qatysyp, óz quramasynyń jeńiske jetýine úles qosty. Oıynnyń 71-mınýtynda Benın qaqpasyna belgilengen penaltıdi múltiksiz oryndap, argentınalyq jankúıerlerdiń qoshemetine bólendi.
Lıonel Messı ulttyq qurama sapyndaǵy alǵashqy oıynyn 2005 jyldyń 4 tamyzynda joldastyq kezdesýde Vengrııa quramasyna qarsy ótkizdi.
2026 jylǵy álem chempıonaty aıaqtalǵannan keıin shabýylshy óziniń ulttyq qurama sapyndaǵy kásibı mansabyn aıaqtaıtynyn jarııa etti. Argentına quramasy jeıdesin 207 márte kııýge múmkindik alǵan ol bul jóninen absolıýtti rekord jasady. Sol oıyndarda 125 márte mergendigimen kózge túsip, joǵary kórsetkishimen erekshelendi.
Aıta ketsek, Lıonel Messı Argentına quramasy sapynda 2008 jyly Olımpıada chempıony atansa, 2022 jyly álem chempıony, 2014, 2026 jyldary álem chempıonatynyń kúmis júldegeri boldy. Sondaı-aq Amerıka kýbogyn 2021, 2024 jyldary eki márte jeńip alsa, 2007, 2015, 2016 jyldary kúmis, 2019 jyly qola júldesine ıe boldy.
Lıonel Messı 1987 jyly 24 maýsymda Argentınanyń Rosarıo qalasynda dúnıege kelgen. 2003 jyldan beri Ispanııanyń «Barselona», Frantsııanyń «Parı Sen-Jermen», AQSh-tyń «Inter Maıamı» klýbtarynda oıyn kórsetip keledi.
Klýbtyq deńgeıde ol Ispanııanyń toǵyz dúrkin chempıony bolsa, UEFA Chempıondar lıgasynda tórt márte jeńis tuǵyrynan kórindi. Oǵan qosa Frantsııanyń eki dúrkin chempıony boldy.
Lıonel Messı segiz márte «Altyn dop» ıegeri bolsa, alty márte «Altyn býtsy» júldesine laıyq dep tanyldy.
Aıta ketsek, Portýgalııa quramasynyń shabýylshysy Krıshtıaný Ronaldý jankúıerlerinen keshirim surap, ulttyq quramadaǵy mansabyn aıaqtamaıtynyn málimdedi.
