Lıon merine jemqorlyqqa qatysy bar degen aıyp taǵyldy

ASTANA. KAZINFORM – Frantsııanyń úshinshi iri qalasy – Lıonnyń meri Gregorı Dýse memleket qarajatyn ysyrap etti degen aıyppen aldyn ala tergeý aıasynda ustaldy, dep habarlaıdy Kazinform agenttiginiń menshikti tilshisi. 

Frantsýz buqaralyq aqparat quraldarynyń habarlaýynsha, Lıon meri jáne «Jasyldar» partııasynyń ókili Gregorı Dýse memleket qarjysyn jymqyrý isi boıynsha tergeý aıasynda kúdikti retinde qaralyp jatyr. Ony Frantsııa prokýratýrasynyń ókilderi ustap, on saǵattan astam jaýap alynǵannan keıin bosatqan.

2024 jyldyń naýryzynda Lıon merııasynda tintý júrgizilgen. Tergeý barysynda Lıon ákimdigi 24 adamdy zańsyz jumysqa qabyldady degen kúdikke ilingen. Bul áreket memlekettik qarjyny jymqyrý maqsatynda jasaldy degen nusqa tekserilip jatyr.

Bostandyqqa shyqqannan keıin Gregorı Dýse merııadaǵy jobalar jetekshileriniń laýazymdaryn «ákimshilik qyzmetter» dep atap, olar saıası emes, qoǵam ıgiligi úshin jumys isteıdi dep málimdedi.

— Bul — shynaıy adamdarmen atqarylatyn naqty jumys, — dedi ol Lıon polıtsııa bólimshesiniń aldynda jýrnalısterge bergen suhbatynda, joba menedjerleriniń mindetteri men olardyń qaladan alatyn jalaqysyna qatysty suraqtarǵa jaýap bere otyryp.

Frantsýzdyq BAQ ókilderi polıtsııa derekterine silteme jasap, Dýseniń jergilikti ýaqytpen tańǵy 08:00–de ustalǵanyn habarlady. Qarjylyq polıtsııa tarapynan tergeý jalǵasyp jatyr.

— Gregorı Dýse qalanyń qalaı jumys isteıtinin túsindirip, qabyldanǵan sheshimderdiń zańdylyǵyn qorǵaý úshin tergeýdiń ádettegi kezeńinde qoǵam ókili retinde tyńdaldy. Ol ádilet júıesimen tolyqtaı yntymaqtastyqta jumys istep jatyr, — dep málimdedi onyń baspasóz hatshysy.

Gregorı Dýse — «Jasyldar» partııasynyń ókili jáne 2020 jyldan beri Frantsııanyń úshinshi iri qalasy — Lıonnyń meri qyzmetin atqarady.

Buǵan deıin Eýroparlamenttiń burynǵy depýtaty, belgııalyq Marııa Arena da adam quqyqtary jónindegi qosalqy komıtetti basqarǵan kezinde jemqorlyq daýyna ilingen bolatyn.

Aıta ketelik Frantsııa soty frantsýzdyq oppozıtsııa jetekshisi men segiz Eýroparlament depýtatyn kináli dep tapqan edi.