«Lınkoln» fılminiń arqasynda Mıssısıpı shtatynda quldyq joıyldy
ASTANA. 20 aqpan. QazAqparat - AQSh-taǵy Azamat soǵysynan 148 jyldan keıin Mıssısıpı shtatynda qul ıelenýshilikke shekteý qoıyldy. Bul týraly FoxNews telearnasynyń saıtyna silteme jasaı otyryp, filmpro.ru habarlaıdy.
Saıttyń jazýynsha, Amerıkadaǵy qul ıelenýshilik qoǵam baıaǵyda tarıh qoınaýyna engen, alaıda Konstıtýtsııaǵa prezıdent Lınkoln engizgen 13-shi túzetý áli kúnge deıin barlyq shtattarda qabyldanbapty. Mıssısıpı shtatynyń basshylyǵy bul túzetýdi jýyrda ǵana engizgen. Bir qyzyǵy, atalmysh shtattyń Konstıtýtsııasynda mundaı túzetýdiń joq ekendigi Azamat soǵysy men odan keıingi qul ıelenýshiliktiń joıylǵandyǵy týraly túsirilgen Stıven Spılbergtiń «Lınkoln» fılmi shyqqannan keıin ǵana belgili bolǵan.
Bul olqylyqty Mıssısıpı ýnıversıtetiniń dotsenti Radjan Batra baıqaǵan eken. «Lınkoln» fılmin kórgennen keıin ol muraǵat qujattarymen tanysyp shyqpaq bolǵan. Osylaısha, ol ózi turatyn shtatta zańdy túrde qazirdiń ózinde «quldy» satyp alyp nemese satyp jiberýge bolatyndyǵyn túsingen.
1865 jyly Lınkoln Konstıtýtsııaǵa engizgen qul ıelenýshilikti joıatyn 13-shi túzetýdi barlyq shtattar qabyldap, tek Mıssısıpı ǵana bas tartqan eken. Bul másele boıynsha daýys berý tek 1995 jyly ótip, rıtıfıkatsııa úderisi sońyna deıin jetpeı qalǵan. Endi mine, ýnıversıtet qyzmetkerleriniń suraýy boıynsha, aqpannyń 7-sinde zańdy túrde qul ıelenýshilikke shekteý qoıyldy.
Aıta ketý kerek, ataqty rejısser Stıven Spılbergtiń «Lınkoln» fılmi 2012 jyldyń úzdik týyndylarynyń qatarynda. Fılm 12 atalym boıynsha «Oskar» syılyǵyna úmitkerlikke usynylyp otyr.
